CHR-7 uyon sa ordinansa

CEBU, Philippines - Gihangop sa Commission on Human Rights CHR-7 ang pagpasar sa konseho og ordinansahon ni Konsehal Leah Japson nga nagdili sa “capital punishment” o ang pagdili na sa mga magtutudlo ug mga ginikanan pagdapat sa mga kabataan kun kini makasala o magpabadlong.

Matud ni CHR-7 regional Director Alejandro Alonzo dihang nahinabi sa Banat News maayo kaayo ang gihimo sa Konseho tungod kay nasubay kini sa mga nasudnong balaod sama sa Akta Republika 7610 o Child Abuse Law.

Gipasabot sa direktor sa CHR-7 nga dili gyud maayong bunalan o dapatan ang bata kun kini magpabadlong ug makasala bisan sa ilang ginikanan tungod kay makahatag kini sa bata og mental, psychological ug physical effect.

Nagkanayon ang direktor nga dunay daghang mga panghitabo nga naglambigit sa pagpangabuso og mga bata ingon man pagpanapat sa mga magtutudlo ngadto sa ilang tinun-an maong haom ug tukma lang nga ipatuman ang maong balaod.

Hinuon giklaro ni Alonzo nga makapalig-on ang maong napasar nga ordinansa sa nasudnong balaod nga nagprotihir sa mga kabataan gikan sa pagmaltrato tungod sa pagpasar ini sa konseho.

Gitambagan sa direktor ang mga ginikanan, magtutudlo ug uban pa sa pagpasabot ug pagmaymay lang sa mga bata nga magpabadlong aron makaamgo sa sayop nga buhat ug dili kay kini kastiguhon.

Alang sa CHR-7 ang mga kabataan maoy vulnerable sector kon sayon daug daugon ug mapasakitan.(/EIM) (BANAT NEWS)