CEBU, Philippines - Patay nang napalgan sa sulod sa iyang apartment ang usa ka Dutch national nga gituohang giatake sa sakit sa kasingkasing sa Zone Pechay sa barangay Paknaan, dakbayan sa Mandaue sa miaging hapon.
Ang namatay mao si Hedricus Andrianos, 44, deborsiyado sa iyang asawa ug temporaryong nagpuyo sa Soling Apartment sa maong dapit.
Si PO3 Herbert Cuyos sa kapolisan sa Presinto 3 sa Mandaue City Police Office (MCPO) nga nagbase sa barangay Paknaan sa maong dakbayan nga nahinabi sa Banat News miingon nga nag-inusarang nagpuyo sa iyang lawak ang maong langyaw kay gibiyaan kini sa gikapuyo nga Filipina.
Gitug-an usab sa mga silingan nga nagpunay na lang og inom og bino gumikan malagmit sa hilabihang kaguol niini.
Dugang pa ni PO3 Cuyos nga sa sulod sa lawak ilang napalgan ang daghang basiyo sa linata nga softdrink uban sa mga tambal nga ilang gituohan nga alang sa sakit niini. Wala makamatikod ang kapolisan nga may foul play ang kamatayon sa maong langyaw. (BANAT NEWS)