Gwen mitunol og hinabang sa Naga

CEBU, Philippines - Atol sa inugurasyon kagahapon sa buntag sa bag-ong gymnasium sa dakbayan sa Naga, mitunol si Governor Gwendolyn Garcia og P1.7 milyones alang sa mga proyekto sa kabarangayan ug laing P378 mil alang sa edipisyo sa Senior Citizen sa maong dakbayan.

Samtang si Bokal Julian Daan mihatag usab og P280 mil alang sa socio cultural program sa siyudad.

Ang Enan Chiong Activity Center nga maoy gisubhan kagahapon nahimutang sa likod sa city hall sa Naga nga gisugdan og trabaho sa miaging tuig.

Ang Gaisano Metro nga nag-abang og P60 mil matag buwan sa sports complex sa dakbayan, mihatag og P29 milyones sa kagamhanan sa siyudad nga maoy gigasto usab sa kasamtangang gym.

Kagahapon gipresentar usab ang Val 2020 Health Program nga modumala sa Vicente Mendiola Medical Clinic, mopalig-on sa nutrition program sa kabataan, mobutang og mga nurse ug midwife sa kabarangayan ug magpadala og doktor kaduha sa usa ka buwan.

Gibutyag ni Mayor Valdemar Chiong nga may 10,000 ka benepisyaryo sa PhilHealth sa iyang siyudad kinsa  pulos nakadawat og mga health card kagahapon.

Bahin sa edukasyon   ang kagamhanan nakapatukod og 60 ka mga classrooms sa miaging tuig, nakakuha sila og dugang 150 ka mga magtutudlo kansang suweldo naggikan sa panudlanan sa siyudad.

Ang kagamhanan sa Naga nakahatag usab og 4,000 ka mga bangko sa nagkalain-laing tunghaan ug nakapadala og 100 ka mga scholar sa unibersidad sa dakbayan sa Sugbo.

Si Kongresista Eduardo Gullas maoy miisa sa kamot ni Gobernador Garcia sa pagpakita sa iyang suporta sa kandidatora sa naulahi sa pagka-senador sa eleksiyon sa sunod tuig.

Lakip usab sa mitambong sa maong inugurasyon si Gerald Anthony “Samsam” Gullas Jr. kinsa modagan isip Kongresista sa unang distrito sa lalawigan sa Sugbo sa umaabot nga piniliay. (BANAT NEWS)