CEBU, Philippines - Tun-an sa Criminal Investigation and Detection Group (CIDG)-7 kun ikapaubos ba sa Witness Protection Progran (WPP) ang usa sa duha ka Haponesa nga giingong gipanglugos sa duha ka mga Korean national sulod sa motel sa dakbayan sa Lapulapu sa miaging semana.
Si Sr. Supt. Jose Pante, hepe sa CIDG nga nahinabi sa mga tigbalita nagkanayon nga ilang himuon ang kutob sa ilang mahimo nga ikapaubos sa WPP ang nahisgutang biktima nga usa ka langyaw.
Matud ni Pante nga kinahanglang maproteksyonan ang maong langyaw aron masiguro ang kaluwasan niini samtang gipaabot ang husay sa kaso sa piskaliya sa dakbayan sa Lapulapu.Nasayran ang usa sa duha ka biktima milarga na ngadto sa Japan niadtong Lunes sa buntag apan nagbilin kini og affidavit nga maoy gibasehan sa CIDG pagpasaka og kasong pagpanglugos batok nila ni Carl Park ug Jung Duk Lee sa piskaliya sa Lapulapu niadtong Martes.
Apan tungod kay hugtanong gihimakak ni Lee nga iyang gihilabtan ang usa sa duha ka Haponesa sulod sa motel hinungdan nga gipaubos ang kaso niini ngadto sa sexual assault. Si Pante mitug-an nga misang-at na sila og Hold Departure Order batok sa mga suspek pinaagi sa ilang abogado nga si Inocencio Dela Cerna tungod kay napanglantawan niya nga dako ang posibilidad nga makapiyansa ang usa sa duha ka Koreano human paubsi niini ang kaso ngadto sa sexual assault.(/WC) (BANAT NEWS)