Nanuyop sulod sa Kapitolyo nasakpan

CEBU, Philippines - Duha ka empleyado sa Kapitolyo ang imbestigahon human usa kanila ang gikatahong nasakpan sa mga gwardiya nga nanuyop og gidudahang ilegal nga drugas sulod sa usa ka departamento sa Kapitolyo sa miaging gabii.

Ang maong duha ka empleyado (mga pangalan gipugngan una sa Banat News) nasakpan sa mga gwardiya nga sila si Rosalio Tigle ug Ruel Illustrisimo nga nagbantay sa maong buhatan.

Nasayran nga ang usa niini usa ka casual laborer nga nasulod sa Kapitolyo niadto pang tuig 1998 samtang ang usa regular employee na sukad sa pagtrabaho niini niadtong buwan sa Marso tuig 2000.

Sa gibutyag sa head guard nga si Servillano Angcay base usab sa spot report sa duha ka gwardiya mihangyo nga mosulod sa Kapitolyo ang regular employee tungod kay duna kini kuhaon. Pipila ka minutos ang milabay misunod usab gilayon ang casual employee nga gikatahong adunay dalang babaye ug mihangyong mangihi lang ang babaye.

Apan nahibulong ang mga gwardiya nga ang casual employee lang ang nanaog ug nagpabilin pa ang babaye ug regular employee kay mosunod lang sila og panggawas.

Tungod sa pagduda gisusi sa mga gwardiya ang buhatan sa Provincial Planning and Development Office (PPDO) diin madestino ang maong regular employee ug diha nila masakpi sa akto nga nag ‘pot session’ kini uban ang maong babaye.

Ang duha daling nanagan ug nabiyaan ang drug paraphernalia, duha ka lighter, duha ka simpack, usa ka cellphone, usa ka cutter, yawe, padlock, polo shirt (uniform) ug usa ka pares sa sapatos. Wala usab mo-duty ang duha ka empleyado kagahapong adlawa.

Si Provincial Administrator Eduardo Habin wala magtuong mabuhat kini sa iyang sakop tungod kay base sa iyang nahibaw-an dili kini badlungon apan mopahigayon sila og imbestigasyon bahin niini. (BANAT NEWS)