CEBU, Philippines - Gipahibalo ni Annabelle Rama kagahapon nga 99% na ang posibilidad nga mosulod siya sa politika human kini makakuha og suporta gikan sa iyang mga kabanay.
Matud pa ni Annabelle nga mianhi sa Sugbu aron pagpasaka og kasong libelo batok sa laing showbiz personality nga si Nadia Montenegro kagahapon, nga mosuroy na siya sa mga barangay sunod semana aron motambong sa mga pulong-pulong sa Team Rama nga gipangulohan sa ig-agaw niya nga si Mayor Michael Rama.
Matud pa ni Annabelle nga duawon niya ang mga kapitan sa norte sanglit sa maong distrito siya nagplano nga modagan pagka-kongresista.
Sumala pa ni Annabelle nga dili makaapekto kaniya ang iyang pagka-artista sanglit daghan naman siya nga mga kaila nga artista ang nagmalampuson sa politika basta maayo lang mobalanse sa oras.
“Pirmi man ko dinhi sa Cebu, sunod semana mosugod na ko og suroy-suroy sa mga barangay, kay sila man akong pabut-on kung angayan ba ko modagan pagka-kongresista o dili,” saysay pa ni Anabelle.
Matud pa niya nga mahibaw-an ra karong Oktubre ang iyang desisyon sanglit nagpaabot ra gyud siya sa resulta sa survey.
Ang maong survey matud pa magpakita kung uyon ba o dili ang mga tawo nga modagan siya pagka-kongresista sa north district. Dugang pa niya nga padayon gihapon siya nga nakadawat og daghang tawag gikan sa iyang mga higala nga padaganon gyud siya aron mahunong na ang pagdumala sa mga del Mar sa north district.
Una na nga gipadayag ni Annabelle kaniadto nga supak gyud siya sa mga flyover nga planong tukoron sa mga del Mar. Susama kini og baruganan sa iyang ig-agaw nga si Mayor Rama.
Samtang ang bana ni Annabelle nga si Eddie Gutierrez misaysay nga kung madayon ang iyang asawa sa pagdagan, iyaha kini nga suportahan ug nagplano usab siya nga iyang iparehistro dinhi sa Siyudad sa Sugbo ang iyang mga anak.
Sa dugang impormasyon may labot niini diha sa report sa TV Patrol Central kagahapon sa hapon, si barangay Kapitan George Rama nga igsuon ni Annabelle mipadayag nga dili siya uyon nga mosulod sa politika ang iyang igsuon. (BANAT NEWS)