Badjao community naninguhang malimpyo ilang lugar

CEBU, Philippines - Ang komunidad sa mga Badjao sa syudad sa Sugbo naninguha sa paghimo sa ilang komunidad sa sitio Pungtod, Alaska, Mambaling sa syudad sa Sugbo nga limpyo ug hapsay pinaagi sa suporta sa Ramon Aboitiz Foundation Inc. (RAFI) Badjau Integrated Area Development Project (BIAD-P).

Ang napulo ka clusters sa mga lider sa maong komunidad gitahasan nga mangulo sa komunidad sa pagmentinar sa kalimpyo sa ilang palibot ug panglawas.

Sumala pa ni Jovelyn Ahmad, Badjao cluster leader nga disiplinado na kaayo ang ilang mga kasilinganan ilabi na ang bahin sa ilang panglawas ug saktong pagbahig sa mga basura. Laing cluster leader usab nga si Lydia Jamare miingon lakip sa ilang nakat-onan mao ang mahitungod sa best parenting practices.

Kini sama sa paghimong responsable sa mga ginikanan nga momata og sayo sa buntag aron mangandam sa mga gamiton, pagkaon sa ilang mga anak nga motungha.

Matag Lunes ang mga Badjao mopahigayon og general cleanup diin silang tanan magtinabangay sa pagpanglimpyo ug pagtanom og mga kahoy sa ilang palibot ug gani gihimo nila kining usa ka indigay kinsa dunay labing daghang natanom.

Ang mga Badjao mipamatuod nga pinaagi sa pagmintinar sa kalimpyo, gamay na lang nga kaso sa kasarangang sakit sa ilang komunidad sama sa ubo ug sip-on. Ang BIAD-P usa ka inisyatibo sa RAFI pinaagi sa ilang Integrated Development Unit, Presentation Sisters ug University of San Carlos kung diin kini nagtumong sa paghimo sa mga Badjao nga usa ka progresibo ug independente nga komunidad nga adunay garbo.

Ang mga Badjao mao kadtong mga namuyo sa kabaybayunan ug nabuhi sa panagat apan dinhi sa mga siyudad sama sa Sugbu mas sagad naila sa publiko nga manglimos sa kadalanan ug sa pantalan apan pinaagi sa paghatag kanila og atensyon sa siyudad sa Sugbu ug sa mga non-governmental organization sama sa RAFI nakat-on sila unsay angayang makat-onan. (BANAT NEWS)