Kasong rape sa 2 Korean gihimong sexual assault

CEBU, Philippines - Gipaubsan sa Lapulapu City prosecutor's office ngadto na lang sa sexual assault gikan sa kasong rape ang gisang-at sa kapulisan batok sa usa sa duha ka Koreano kinsa gipasanginlan nga miamong-among sa duha ka Haponesa.

Si Jong Duk Lee gipaabot nga makapiyansa sa maong kaso alang sa iyang temporaryong kagawasan kinsa anaa na karun sa Lapulapu City Jail. Nasayran si Lee ug Carl Park gibalhin na sa Lapulapu City jail niadtong Miyerkules sa hapon. Base sa affidavit sa usa sa duha ka biktimang Haponesa nagkanayon nga si Lee misuway og hikap sa pribadong parte sa iyang lawas samtang siya hubog niadtong higayona sulod sa motel diha sa dakbayan sa Lapulapu.

Sa pikas bahin ang representante sa Japanese consular office mibisita niadtong Miyerkules sa buhatan sa Criminal Investigation and Detection Group-7 ug mipahibawo nga ang Japanese government misuporta sa duha ka biktima sa pagpangabuso.

Si Yoshiaki Hata, sa ambush interview sa mga tigbalita miklaro nga ang Japanese government mihimo na og lakang sa maong kaso.

“The Japanese government will support in all means in behalf of the victims,” matud pa ni Sr. Supt. Jose Pante, hepe sa CIDG-7 kinsa miklaro nga duna lay gamay nga miscommunication sa iyang buhatan ug sa buhatan sa Japanese consulate bahin sa maong kaso.

Sa sayo pa, si Lee miinsister nga way nahitabong pagpanglugos sulod sa motel ug bisan gamay wala gani siya mohikap sa lawas sa biktima. Si Lee nga mitingog human sila gipasakaan og kaso ni Park, miingon nga naluoy gani siya sa duha ka biktima nga hubog niadtong higayona. (BANAT NEWS)