Modagmal sa anak silotan

CEBU, Philippines - Giaprobahan kagahapon sa konseho sa dakbayan sa Sugbo ang ordinansa nga mosilot sa mga ginikanan nga hinagmal og anak. Nakombinser gayud ni Konsehal Leah Ouano-Japson ang kaubanan niya nga mga konsehal nga aprobahan ang gisugyot niya nga ordinansahon kay ang tumong niya nga maprotehian ang kabataan sa pagpangabuso bisan sa ilang kaugalingong ginikanan.

Gawas sa mga ginikanan, ang mga maestra ug ubang “guardian” sa kabataan sama sa mga katabang sa panimalay lakip nga kasilotan kun modagmal sa ilang mga tinun-an ug sa mga bata.

Si Rhea Mar Angtud nga maoy Cebu City public schools superintendent nahinangop kaayo sa maong ordinansa.

Matud ni Angtud nga ang Department of Education (DepEd) dugay na nga adunay lagda nga ang mga maestra dili modagmal sa ilang mga tinun-an. Apan si Mayor Michael Rama wala pa moklaro kun aprobahan ba niya ang maong ordinansa kun moabot kini sa iyang lamesa. Matud ni Rama nga bisan siya nakatilaw og bunal kaniadto sa iyang ginikanan kun makasala mao nga nahimo siya nga buotan. Si Konsehal Jose Daluz III gusto gayud unta nga dili ilakip ang mga ginikanan sa silot kun mohimo og disiplina sa ilang mga anak, apan nalupig siya sa gidaghanon sa mga konsehal nga misuporta ni Japson. Gipasabot ni Japson nga samtang ang mga ginikanan adunay katungod pagdisiplina sa ilang mga anak, apan nakabantay siya nga daghan sa mga ginikanan kun modisiplina subra na kaayo nga usahay sama na sa hayop.

Ang grupo nga Bantay Banay, usa ka non-government organization (NGO) nga nagpakabana sa pagpangabuso sa kababayen-an ug kabataan, nahinangop   sa maong kalamboan.

Ang kopya sa maong ordinansa ipadala ngadto sa buhatan ni Rama aron iyang kapirmahan. Kun dili mopirma ang mayor, mahimo nga ma-override ang iyang veto pinaagi sa 2/3 vote sa mga sakop sa konseho. Ang maong ordinansa ipublikar sa mantalaan ug human sa 15 ka adlaw mahimo na kini nga ikapatuman.

Ubos sa maong ordinansa, bisan ang pagkasaba sa bata nga maisip na nga magpakauwaw kaniya, ang naghimo niini masilotan na og pagkapriso   sa dili molabaw sa unom ka buwan ug multa nga dili molapas sa P5,000.

Lakip sa gidili mao ang pagdagmal, paghimo’g mga lihok nga masakripisyo ang bata sama sa pagpabuwad kanila sa init o kaha pauwanan nga mag-antos na sa katugnaw, pagpriso sulod sa gamay kaayo nga kwarto nga walay presko nga hangin nga makasulod, pagputol sa buhok, ug daghan pa. (BANAT NEWS)