Helmet nga sihag og screen ipasul-ob

CEBU, Philippines - Ang kapolisan sa Central Visayas misugyot nga helmet nga sihag og screen o walay screen maoy ipasul-ob sa   mga motorista nunot niining pagpatuman sa Helmet Law.

Kini aron sa pagpaluya sa mga kriminal gikan sa pagbuhat og krimen samtang magsul-ob og helmet nga may dark screen.

Mao kini ang gibutyag ni manlalaban Sandro “Ronnie” Oriol, National Police Commission (NAPOLCOM) 7 kagahapon atol sa Talakayan sa Isyung Pulis sa PRO 7 Headquarters, samtang sugdan na ang pagpatuman sa Helmet Law sa umaabot nga Agusto 1, 2012.

Gihimo ni Oriol ang maong pamahayag tungod kay subay sa panukdanang gitakda sa Department of Trade and Industry (DTI)7 usa ra ang desinyo nga gitan-aw niini sa helmet nga ipasul-ob sa mga motorista nga mao ang iyang kalidad, sa kalig-on nga di daling mabuak kun madisgrasya ang magsul-ob  niini.

Ang sticker nga PS kon Philippine Standard ug ICC kun Import Commodity Clearance moduyog na lang ug ipapilit sa helmet nga mopasar sa quality test nga himoon sa DTI.

Apan sa bahin sa taga Police Regional Office (PRO) 7 wala silay supak sa pag-abalo kon asessment nga himoon sa taga DTI sa matang sa helmet nga ipatuman sa balaod nga gimbut-an usab sa United Nations.

Tungod kay alang kanila gawas nga maayo og kalidad ang maong helmet, ang desinyo sa helmet  nga angay ipagamit sa mga motorista mao kadtong makapaluya   sa mga kriminal gikan sa pagbuhat sa krimen nga gusto nilang buhaton, sama sa pagpatay, o kaha pagpanulis ug uban pang matang sa krimen.

Sa laktod gusto sa kapolisan nga kadtong helmet nga makita ang dagway sa magsul-ob niini ug dili kay helmet kansang dark screen niini sa atubangan motago sa dagway sa magsul-ob.

Matud pa ni Oriol nga   dako kaayo og kalainan ang helmet nga may dark screen ug kadtong  transparent screen, kay sa naulahi makita ug dali ra nga maila ang dagway sa magsul-ob niini itandi sa nahauna.

Busa nakahukom si PSupt. Orlando D. Ualat, ang Regional Chief Directorial Staff sa PRO7 nga magpadala sila og suwat ngadto  sa Camp Crame aron ipahibawo nila nga ang gusto nilang desinyo sa helmet nga isul-ob sa mga motorista nunot niining pagpatuman sa Helmet Law mao kadtong helmet nga may sihag nga screen o walay screen.

Hinuon makigtagbo pa sila sa mga opisyal sa DTI kalabot ning maong isyu, matud pa ni Ualat. (BANAT NEWS)