Modernong paghipos sa basura ipatuman sa Lapu

CEBU, Philippines - Pormal nga gipresentar ngadto sa mga sakop sa media ang bag-ong teknolohiya sa pagkolekta sa basura nga dili maapektuhan ang panglawas sa tawo ug zero waste nga gidamgo sa dakbayan sa Lapulapu.

Si Lapulapu City Mayor Paz Radaza pormal nga mipaila sa Zehera USA, usa ka kompaniya nga mogamit og German technology paghipos sa basura nga maoy kakuhaan sa enerhiya ug daling paglain sa mga mapuslan pang basura.

Si Michael Jimenez ang Presidente sa Zehera USA mipasalig nga environment friendly ug walay basurang mausik sanglit gamiton kini aron makatabang sa panginahanglan sa suplay sa kuryente. Ang maong pasilidad modawat og malata ug dili malata nga basura tungod kay aduna kini kaugalingong pamaagi o ekipo pagbuwag niini.

Gipanglantawang dili lang unya ang taga Lapulapu maoy makapahimulos sa maong pasilidad tungod kay dunay posibilidad nga bisan ang mga silingang dapit mahimong makadala sa ilang basura sa maong pasilidad.

Kini ibutang unya diha sa upat ka ektaryang luna tupad sa Material Recovery Facility sa sitio Soong sa barangay Mactan, kini gahinan og P1.2 bilyones.

Matud pa ni Radaza makatabang kini sa pagsulbad sa problema sa basura sa dakbayan sa Lapulapu ug makahatag pa kini og dugang trabaho sa mga Oponganons.

(/EIM)(BANAT NEWS)