Restrictions sa driver's license

CEBU, Philippines - Pwerteng pagmahay sa usa ka tag-iya og motorsiklo kay giusab niya ang desinyo sa napalit niyang motor ug ang plate number diha niya gibutang sa kilid nga dili makita sa luyo.

Ang maong drayber nadakpan sa mga sakop sa Land Transportation Office-Task Force Alpha (LTO-TFA), una tungod sa “improper placement of plate numbers,” dayon nasakpan pa gyud nga wala diay Restriction Code-1 ang iyang lisensya.

Kun wala pa niya usba ang desinyo sa iyang motor diin gitangtang ang suga nga buhat sa pabrika ug giilisan nga daw walay makita nga suga, dayon gibalhin ang plate numbers sa kilid, dili unta siya madakpan.

Ang multa sa maong kalapasan P578. Swerte kay ang nagdakop kaniya wala na lang modaginot sa lain niya nga kalapasan nga mao ang pagsul-ob og tsinelas samtang nag-drive nga may multa usab nga P578.

Nasuta nga ang lisensya niini adunay Restriction Code 2-3, nga nagpasabot nga mahimo lang siya nga maka-drive og sakyanan ug dili motorsiklo.

 Kataw-anan paminawon ang balaod kay kadtong gitugotan nga maka-drive og sakyanan dili makamaneho og motor kun walay Restriction Code-1.

Si LTO-7 lecturer Ronald Lim mitataw nga kadtong mga drayber nga Restriction Code-4 lang ang anaa sa ilang lisensya, gitugotan lang usab nga makamaneho og “automatic vehicles.”

Kun ang maong mga drayber gusto nga mo-drive og mga “manual-type” nga sakyanan sama anang adunay mga kambiyu, mahimo na sila nga dakpon tungod kay wala sila tuguti nga mo-drive niini.

Lahi kun ang usa ka drayber nga ang lisensya dunay Restriction Code 2-3, ingon man 1-2-3 kay mahimo sila nga mo-drive og mga automatic vehicles bisan og wala sila’y Restriction Code 4. (BANAT NEWS)