Ginang nga "pusher" nadakpan

CEBU, Philippines - Usa ka babayeng gipasanginlan sa kapulisan nga level 2 drug pusher ang nadakpan atol sa buybust operation sa miaging alas-4 pasado sa hapon diha sa Villagonzalo 2 sa barangay Tejero ning siyudad sa Sugbu. Base sa report sa City Intelligence Branch (CIB) ug City Anti-Illegal Drugs Special Operation Task Group (CAIDSOTG) sa Cebu City Police Office (CCPO) giila ang dinakpan nga mao si Janet Dela Cruz Paslon, 48, residente sa maong lugar.

Ang mga sakop sa CIB ug CAIDSOTG pinangulohan ni Insp. William Alicaba giingong nakapalit og usa ka paketeng shabu sa suspek ug dihang nahuman sa transaksyon gisikop kini dayon.

Gawas sa usa ka paketeng may sulod nga gidudahang shabu, nakuhaan kini og laing usa ka dakong putos ug laing pito ka pakete nga may sulod nga gidudahang shabu.

Si Chief Insp. Romeo Santander, hepe sa CIB mitug-an sa mga tigbalita nga ilang gipanid-an sulod sa duha ka semana si Paslon. Misuway pa unta pag-eskapo si Paslon sa sekretong pultahan nga gialihan og gamay nga aparador sulod sa iyang balay apan naabtan kini. Matud ni Santander nga organisado ang grupo ni Paslon ug mohurot kini og duha ka bultong shabu matag semana diha sa Villagonzalo. Tungod sa iyang pagkasikop magkita unya sila sa iyang bana nga nabilanggo usab sa Cebu City Jail tungod gihapon sa pagpamaligya og ilegal nga drugas.

Si Paslon dihang na-interbyu sa Buena Mano Balita kagahapon sa buntag miangkon nga namaligya gyud siya og drugas apan gihulagway niya ang iyang kaugalingon nga usa lamang siya ka isdang ‘ibis’ kun itandi sa uban dihang namaligya og ginadiling drugas. (BANAT NEWS)