Plebisito gipanghinaut nga walay pamolitika

CEBU, Philippines - Nanawagan ang mga molupyo sa barangay Guadalupe sa dakbayan sa Sugbu nga dili apilan og politika ang nagsingabot nga plebisito alang sa pagtunga sa ilang barangay.

“Manghinaot mi nga wa untay pulitika pareha sa una kay basin di pud unya madayon, para pud way maka-impluwensiya sa pagbotar sa mga taga Guadalupe,” matud pa ni Joefrey Cartilla, bise presidente sa United Banawa-Englis Association, Inc. (UBEA).

Ang UBEA maoy nagduso nga tungaon ang barangay Guadalupe sa duha ka barangay, ang usa pagatawgong barangay Banawa-Englis. Hinuon mapasalamaton si Cartilla nga bisan pa sa pagsupak ni Barangay Kapitan Michael Gacasa sa Guadalupe ug kadaghanan sa iyang mga kagawad niini sa maong tumong, wala sila’y gihimong lakang nga babagan ang umaabot nga plebisito.

Ang maong plebisito gikatakda na karong Hulyo 28, ug ablihan na ang pagpangampaniya karong Hulyo 12 hangtud 26.

Mapasalamaton hinuon si Cartilla nga lakip si Kong. Tomas Osmeña midasig sa mga taga Guadalupe nga kinahanglang mobotar gyud sa maong adlaw. Niadtong 1995 unang gisuwayan nga tungaon ang maong barangay pinaagi sa pag-aprubar sa Cebu City ordinance nga gipangamahanan ni kanhi Cebu City Councilor Ronald Cuenco.

Hangtud nga ang amahan ni Cuenco nga si kanhi kongresista Antonio Cuenco mipasar og balaudnon nga susama og tumong ug niadtong 2010 ra kini naaprubahan sa Kongreso. (BANAT NEWS)