"Mistaken identity" ra diay

DUMAGUETE CITY, Philippines  – Gipasalig ni Senior Supt. Edward Carranza, ang provincial director sa Negros Oriental Police nga walay “whitewash” nga mahitabo sa imbestigasyon sa giingong pagsuway pagkarnap sa sakyanan sa usa ka law student niadtong Huwebes nga diin ang nalambigit mao ang mga intelligence operatives sa Dumaguete City Police.

 Matud pang Carranza dunay mga “procedural lapses” sa habig sa maong mga polis nga gipangulohan ni Insp. Don Richmond Conag ug kini maoy ilang tutokan sa imbestigasyon nga buhaton sa Police Regional Office-7.

  “It was not an alleged attempted carnapping incident as earlier feared by the victim (kansang pangalan gipugngan) but a case of mistaken identity,” matud pang Carranza.

 Kini maoy mitumaw nga eksplinasyon sa nahitabo dihang nagkita sila si Carranza, ang biktima ug abogado niining si Myles Bejar, Supt. Crisaleo Tolentino, ang hepe sa City Police ug uban pa. Sa pasiunang special and pre-charge report ni Tolentino kang Carranza kini mibutyag nga base sa pamahayag ni Conag kaniya nagpahigayon ang intelligence team sayo nianang orasa og anti-illegal drugs buy-bust operation sa San Jose Street Extension sa maong siyudad.

 Giingong usa nila ka asset ang mitudlo sa sakyanan sa maong biktima nga maoy subject sa ilang operasyon apan nakaikyas hinungdan sa nahitabong ginukdanay, ang maong biktima nagtuong mga carnapper ang migukod kaniya maong mipasutoy kini sa iyang sakyanan.

 Matud pa gibabagan og sports utility vehicle (SUV) ang sakyanan sa biktima ug nanganaog ang upat ka armadong lalaki hinungdan nga miatras kini ug mipasutoy palayo, apan gigukod siya ug gipusil hinungdan sa pagkabuslot sa iyang sakyanan ug mga ligid. Ang reklamante milahos sa police station ug diha na niya makit-ing mihunong usab ang sakyanan sa migukod kaniya ug nakig-estorya sa mga polis ug daling mibiya. Matud pang Carranza mag-atubang og kasong administratiba ang grupo ni Conag.

 Matud pang Carranza angayang nagpaila dayon ang mga operatiba ug kung mopasutoy mitawag gyud unta sila dayon og backup aron mababagan kini. (/EIM)   - BANAT NEWS