CEBU, Philippines - Ubay-ubay nga mga armas ang nasakmit sa Provincial Intelligence Branch (PIB) atol sa buybust operation sa miaging alas-10 sa gabii diha sa barangay Taytay sa dakbayan sa Danao gikan sa usa ka gidudahang ‘gun runner.’
Nasikop usab ang suspek nga giilang si Generoro Gian Libot-libot, molupyo sa maong lugar kinsa nasakmitan og 19 ka armas, napulo niini kalibre .357 revolvers ug siyam ka .45 pistol.
Si Supt. Rodulfo Albotra, hepe sa PIB nga nahinabi sa mga tigbalita nagkanayon nga nagkantidad og P125 mil ang tanang armas nga ilang nasakmit.
Matud ni Albotra nga migamit sila og security agency aron motuo ang suspek nga mopalit gyud sila og armas, unang mi-order ang PIB og walo ka shotguns apan atol sa buybust operation gitagoan kini sa suspek kay nagtuong dili tinuod nga sila mopalit og daghang armas.
Apan hugtanong gihimakak ni Libot-libot ang pasangil nga siya maoy nibaligya sa armas ngadto sa kapulisan.
“Wa koy kalibotan ani, wala ko kahibawo naay armas ingon ani kadaghan, naa koy duha ka anak, delivery ra ku og tungog, wa ko’y kalibotan, wa gyud ko kahibawo ana,” kusganong panghimakak ni Libot-libot.
Si Sr. Supt. Patrocinio Comendador, hepe sa kapulisan sa probinsya sa Sugbu miingon nga kabahin kini sa gihingusgan nilang kampanya batok sa loose firearms.
Base sa ilang nakuhang impormasyon nga kasagaran sa mamalit og armas diha sa Danao gikan sa laing probinsya.
Nasayran nga nag-una ang Cebu Provincial Police Office (CPPO) sa kampanya sa loose firearms sa tibuok Central Visayas karong tuiga. (/EIM) - BANAT NEWS