CEBU, Philippines - Padayong gipanalipdan sa Department of Health (DOH) ang dungog sa Eversely Child Sanitarium (ECS) nga nagbase sa barangay Jagobiao, dakbayan sa Mandaue kay usa kini sa upat ka hospital dinhi sa Sugbo nga direktang giatiman sa DOH7 nga alang sa publiko ug dili lamang kay sa mga sanglahon.
Si Joy Casquijo, usa sa mga kawani sa ECS nagkanayon nga sa pagkakaron may usa ka ward nga may 50 ka katre ang gigahin alang sa mga pasyente nga dili sanglahon sa maong tambalanan. Apan matud pa niya nga sa dili madugay modako na ang maong ward kun kaaprobahan ang usa ka balaodnon ni Kongresista Luis Luigi Quisumbing sa ika-6 nga distrito sa lalawigan sa Sugbo nga himoon nang 100-bed capacity ang general ward.
Ang laing tulo ka hospital nga direktamenting gidumala sa DOH7 mao ang Vicente Sotto Memorial Medical Center, Talisay City District Hospital ug ang Mother and Child Hospital sa barangay Mambaling ning dakbayan sa Sugbo.
Gipasabot ni Casquijo atol sa tulomanon Alagad sa Serbisyo Sibil kauban sa taga Civil Service Commission (CSC)7 nga gipalanog sa DYMR Radyo ng Bayan kagahapon nga sa ECS may pito ka nagkalainlaing edipisyo alang sa nagkalainlaing pasyente ug usa niini mao ang mga pasyenteng sanglahon.
Busa alang kaniya nga dili angay kahadlokan sa mga pasyente nga dili sanglahon nga matakdan sila sa sakit nga sangla tungod kay lahi ang building o ward alang sa mga sanglahon ug lahi usab ang general ward o alang sa publiko nga dili sanglahon. Ikaduha matud pa ni Casquijo nga ang labing tinuod ang sakit nga sangla karon mura na lang og sakit nga panuhot nga sayon ra kaayong ayuhon busa dili na kini usa ka kahadlokang sakit nga makamatay.
Gani matud pa niya nga ang palibot sa ECS nahimong managsilingan ang mga nangaayo na sa sangla ug kadtong wala makasinati sa maong sakit nga anaa sa walo ka sitio nga sakop pa sa 52 ektaryas nga katibuk-ang kayutaan sa ECS sa Jagobiao, matud pa ni Casquijo.
Gumikan niini gidasig niya ang ubang masakiton nga dili angay mabalaka kun ma-admit sila sa ECS tungod kay kompleto kaayo kini og kahimanan kay giatiman kini pag-ayo sa DOH7. (/WC) - BANAT NEWS