Lolo gipusil patay sud sa balay

CEBU, Philippines -  Patay nang napalgan sa mga silingan ang 66 anyos nga lolo nga may pinusilan sa nawong sulod sa iyang balay didto sa Sitio Baybayon, barangay Calero lungsod sa Liloan kagahapon sa alas 6:00 sa buntag. Ang biktima mao si Agustin Caballero Ayuda, 66 anyos, minyo ,nga nagpuyo sa maong lugar, samtang ang suspek nailhan lang sa ngalan nga J.R.

 Si SPO4 Wendrie Pilapil, desk officer sa Liloan Police Station mibutyag sa Banat News  nga ang silingan sa biktima nga nailhang si Lilia Gemenez maoy mipahibawo kanila sa maong alarma. Nasayran sa kapolisan gikan sa mga silingan nga niadtong Domingo  sa alas 5:00 sa hapon nadunggan nila nga may gikalalis kini nga ginganlan og JR kinsa gisultihan kuno sa biktima nga dili angay mag-inisog kay dili siya (JR) molupyo sa maong lugar.

 Unya nakita kuno sa mga silingan si JR nga milakaw ug mibiya sa payag sa biktima nga nagpangusmo sa kasuko. 

 Sa pagka-alas 8:00 sa gabii sa maong adlaw mao nalay nabati sa mga silingan ang mga buto sa armas de fuego sa payag sa biktima ug pagsil-ing nila sa payag kagahapon sa buntag nagbuy-od na sa sawog ang biktima nga wala nay kinabuhi.

 Padayon pang gipangita sa kapolisan ang suspetsado. (/WC)  - BANAT NEWS