CEBU, Philippines - Nakaila kaayo ang hepe sa kapulisan sa probinsya sa Sugbu sa polis nga nagranggo og SPO4 nga gitumbok nga maoy supplier og shabu sa usa ka kanhi seaman nga namaligya na og shabu human nadakpan sa miaging adlaw diha sa barangay Tangke sa dakbayan sa Talisay.
Si Sr. Supt. Patrocinio Comendador nagkanayon nga wala kini madestino sa probinsya sa Sugbu ang maong polis nga wala usab niya hinganli apan giingong kaniadto pa siya nakadungog og report nga supplier kini og ilegal nga drugas.
Matud pang Comendador nga daghan og sakop ang maong grupo ug mao kini ang nanghulga sa hepe sa kapulisan sa lungsod sa Argao tungod kay nasuko kining daghang mga pushers niini ang gidakop. Nanghinaot si Comendador nga moluwat og pinanumpaang pamahayag ang dinakpang si Albert Salem alyas “Apar” ug Migo”, 42, nagpuyo sa sitio Galaxy sa barangay Tangke kinsa nadakpan human makuhai og mga ilegal nga drugas.
Gidakop siya sa kapulisan pinangulohan ni Supt. Eddie Recamara human nagbaton og daghang drugas diha sa iyang pinuy-anan.Matud ni Comendador ang operasyon ni Recamara niadtong miaging adlaw, tipik kini sa ilang kampanya sa ginadiling drugas.
Kahinumdoman nga gisaway og maayo ug gipasanginlang ‘protektor’ sa mga drug personalities si Recamara butang nga gihimakak niini ug nagdudang gidaot lang ang iyang pangalan sa mga tawong may personal nga kasuko kaniya. ( EIM) - BANAT NEWS