Cebu ma-rabies free na

CEBU, Philippines - Hapit na molampos si Governor Gwendolyn Garcia sa iyang damgo nga mahimong rabies free ang lalawigan sa Sugbo sa tuig 2013.

Gitug-an sa Assistant Provincial Veterinarian, Dr. Mary Ann Gabona nga gihingusgan pag-ayo sa ilang buhatan ang kampanya sa pagsumpo sa sakit nga rabies hinungdan nga misaka sa 90.16 porsento ang kalamposan sa ilang Rabies Eradication and Control Program nga gipasiugdahan sa gobernador.

Matud ni Gabona nga sa tuig 2011 nakarehistro sila og 316 mil ka mga iro sa tibuok lalawigan.

Apan iyang gitataw niini sa tunga-tunga nga pa lamang sa tuig 2012 mikabat na sa 289 mil kun 90.16 sa gidaghanon sa mga iro nga nabakonahan sa mga kawani sa municipal agriculture office.

Sumala pa ni Gabona nga hayan sa dili pa matapos ang tuig 2012 hingpit na nilang mabakonahan ang mga iro lakip na ang mga iring sa kalungsoran sa lalawigan.

Midugang siya nga usa sa nag-unang indikasyon sa ilang kalamposan mao nga wala nay natala nga nahospital o kaha namatay tungod sa rabies.

Usa sa ilang gihimong kalihukan mao ang pagpahigayon og Canine Surveillance Training sa North Winds Hotel sa syudad sa Sugbo nga gitambongan sa 53 ka opisyal ug kawani sa municipal ug city agriculturist o veterinarian sa mga lungsod ug siyudad sa lalawigan alang sa tinguha niining mahimong rabies free na ang lalawigan sa Sugbo sa sunod tuig. (BANAT NEWS)