Duha ka langyaw nangawat sa silingan

CEBU, Philippines - Duha ka mga langyaw ang gipasanginlang pugsanong misulod sa usa ka panimalay sa ilang silingan ug nangawat pasado alas-11 sa buntag niadtong petsa 13 ning buwana diha sa barangay Malhiao sa lungsod sa Badian. Ang gikiha mao sila si Michael Friis, usa ka Danish ug Thomas Leroy Copper, nga usa ka Amerikano pulos nagpuyo sa maong lugar tungod sa reklamo ni Emerlinda Taboada, 59. Si Taboada mibutyag diha sa iyang affidavit nga nakadawat siya og text message gikan sa iyang anak nga nagpahibalong pugsanong misulod sa ilang balay ang maong mga langyaw.

Matud pa gisuwayan nila kini pagpugon apan wala sila panumbalinga sa duha ug gikuha ang ilang duha ka telebisyon, duha ka speakers ug duha ka cellphone chargers.

Gibutyag ni Taboada nga iyang nasayran nga duna diay utang ang iyang anak kang Friis nga nagkantidad og P5 mil nga wala niini mabayri. Nagtuo si Taboada nga mao kini ang hinungdan nganong gikuha sa maong langyaw ang ilang mga butang.

Ang kapolisan sa lungsod sa Badian mipahigayon og imbestigasyon sa maong kaso diin giingong boluntaryong giuli ni Friis ang maong mga butang, apan bisan paman niini gipasakaan gihapon sila og kasong robbery. (BANAT NEWS)