Bana sa gi-ambush nga ginang gidakop

CEBU, Philippines - Gidakop sa kapolisan ang bana sa namatay nga ginang sa pagpamanhig nga nahitabo sa sitio Bohol-Bohol sa barangay Looc sa dakbayan sa Mandaue nidtong nakalabay’ng Biyernes sa gabii.

Ang gidakop mao si Diego Sagaad, 45, bana sa babayeng namatay nga si Melanie Sagaad, kinsa gipusil sa ulo ug sa dughan uban sa giingong “kabit” niini nga si Armado Irog-Irog. Si Irog-Irog talandugon usab ang kahimtang human sa pagpamusil.

Ang suspek usa ka cook sa usa ka motel sa dakbayan sa Talisay kinsa natultulan sa kapolisan inabagan sa 15-anyos nga anak niini.

Sa pakighinabi sa Banat News ni PO1 Nelton Silao, sa Mandaue City Police Investigation and Detective Management Branch (IDMB) mibutyag kini nga human sa pagpamusil ilang giadto si Sagaad.

Matud pa ni Silao nga dihang ilang nakit-an si Sagaad nagduda na kini sa tinubagan niini.

Matud pa nga dunay mga nakuhang testigo ang mga imbestigador nga nagtumbok kang Sagaad nga giingong nakit-an kining nag-estambay sa eskina diin mahitabo ang pagpamusil.

Sumala pa ni Silao kapin sa usa ka oras nga nag-estambay si Sagaad sa maong dapit ug gidudahan kini sa kapolisan nga nag-atang sa mga biktima.

Ang mga biktima unang gidasmagan sa motorsiklo sa mga gunmen ug wala pa gani sila makabarog gipaulanan sila dayon og bala tumong sa mga ulo ug kalawasan.

Nagpadayon pa ang imbestigasyon aron pagpalig-on sa kaso ug pagtino kung may kalambigitan ba gyud si Sagaad kinsa giingong onse na ka tuig nga buwag sa babayeng biktima. (BANAT NEWS)