Polis ang 'supplier' og shabu

CEBU, Philippines - Usa ka kanhi seaman nga giingong level 2 nga drug pusher ang mitumbok sa usa ka sakop sa kapolisan nga maoy iyang “supplier” og shabu human kini nadakpan sa gipahigayong pagpangronda sa kapolisan kagahapon sa kaadlawon diha sa sitio Galaxy, barangay Tanke, dakbayan sa Talisay.

Ang gidakop mao si Albert Salem alyas “Apar” ug “Migo”, 42, nagpuyo sa maong dapit. Kini gidakop human madiskubrehang nagbaton og mga ilegal nga drugas subay sa search warrant nga giisyu ni Regional Trial Court Judge Enriquita Belarmino sa Branch 57.

Si Salem maoy nakasubo sa bag-ohay pang gitukod nga Talisay City Police Station City Anti-Illegal Drugs Special Operation Task Group (CAIDSOT-G).

Nakuha diha sa iyang panimalay ang usa ka medium size pack nga gidudahang ang sulod shabu; digital weighing scale; mga drug paraphernalia; usa ka receiver, slide nga dunay barrel sa kalibre .45 nga pistol; usa ka magazine nga dunay usa ka buhing bala sa kalibre .45.

Gibutyag ni Supt. Eddie Recamara ang hepe sa Talisay City Police Station nga si Salem naa sa watch list sa mga drug personalities sa Talisay, giingong mohalin kini og P200, 000 nga shabu matag semana.

Sumala pa ni Recamara mitug-an kanila si Salem nga polis ang tigsuplay kaniya sa gibaligyang shabu. Giingong nagranggo kini og Senior Police Officer 4 (SPO4) nga nadestino gawas sa Talisay.

Ang Banat News dili una mohingalan sa maong polis samtang wala pay pormal nga imbestigasyon o kasong ipasaka batok niini.

Si Recamara miingon nga mopadala siya og report kabahin sa alegasyon ni Salem sa maong polis ngadto sa ilang ulohang buhatan, apan wala usab niya isalikway nga posibleng gigamit lang sa suspek ang pangalan sa maong polis.

Taudtaod nang gipanid-an sa TCPS ang kalihukan ni Salem apan wala nila kini dayon maaksyuni sanglit gipailawom pa og pagbansaybansay ang mga polis nga gitahasan sa kampanya batok sa ilegal nga drugas diha sa Philippine Drug Enforcement Agency (PDEA).

Niadtong milabay’ng duha ka semana upat ka mga sakop nga sila si SPO1 Joel Rosales, PO3 Oliver Ortega, PO1 Stephen Sefuesca ug PO1 Euwen Pitogo ang mitapos sa seminar sa PDEA hinungdan nga niining ulahi lang natukod sa TCPS ang CAIDSOT-G. Si Salem nga upat ka tuig nga overseas seaman dihang nahinabi sa Banat News kagahapon nagkanayon kini nga unang higayon pa siyang nasikop ug nagmahay siya tungod niini.

Uban usab ni Recamara sa maong pagpangronda si Inspector Hugo Rio Ipong, SPO3 Frederick Larrobis, PO3 Arnold Damasco, PO2 Roy Lofranco ug ang mga sakop sa Special Reaction Unit (SRU). 

Sa laing bahin, ang hepe sa Police Regional Office (PRO)-7 nga si Chief Supt. Marcelo Garbo nagkanayon nga kung moluwat og pormal nga dokumento si Salem sa pasangil niini nga polis ang iyang supplier og shabu mopahigayon sila og imbestigasyon batok sa maong polis. Hinuon ilaha nang susihon ang maong alegasyon ug kung mapamatud-an ang pamahayag ni Salem hatagan nila og kahigayonan ang maong polis nga makapanalipod sa iyang kaugalingon pinaagi sa hustong proseso.

Gipasabot ni Garbo nga lisod tuohan ang testimonial evidence apan dili usab nila kini ibasura.

Sa anti-illegal drugs operations, nadakpan sa mga sakop sa Carcar City Police Station ang usa ka Lilibeth Dayondon, 30, atol sa gipahigayong pagpangronda kagahapon sa buntag diha sa sitio Lagang, barangay Boliwanan.

Nakuha sa mga polis gikan sa inidoro sa pansayan sa balay niini ang 19 ka paketeng gituohang shabu nga gituohang gisuwayan unta niini pag-flush aron walay makuhang ebidensya dihang nangabot ang mga polis.

Ang raiding team nakakuha usab og mga drug paraphernalia ug P600 nga kwarta nga gituohang halin niini sa ginadiling drugas.

Ang operasyon natigayon subay sa search warrant batok kang Dayondon nga giluwatan ni Regional Trial Court (RTC) Sylvestre Maamo sa Branch 17.

Si PO2 Rosendo Binondo imbestigador sa Carcar City Police Station miingon nga una pa ang operasyon mipahigayon una sila og ‘test buy’ kang Dayondon diin positibo ang resulta.

Si Dayondon ug Salem parehong mag-atubang og kasong kalapasan sa Akta Republika 9165 kun “Comprehensive Dangerous Drug Act Law”.