Sa kasaysayan karon

Hunyo 24

CEBU, Philippines - 1571—Duha ka adlaw human madeklarar nga Spanish Governor General sa Pilipinas si Miguel Lopez de Legazpi iyang giestablisar ang Manila isip Kapital sa Pilipinas. Gikan niadto gisugdan o gipalig-on og maayo ang gitawag nga “Walled City” o   Intramuros nga diin magbase sa panggobiyerno sa kolonya sa Espanya.

1968—Namatay ang American pediatrician ug microbiologist nga si Hattie Elizabeth Alexander kinsa maoy unang mihimo og mga lakang aron batokan ang sakit nga influenza meningitis nga ang kadaghanang takboyan mao ang mga bata. Tungod sa iyang mga pagtuon ug pagdukiduki sa microbiological genetics. Pinaagi niini nakaimbento siya og tambal o antiserum kontra H.influenzae type b. Tungod sa iyang antiserum namenusan og 20 porsiyento ang gidaghanon sa mga batang natakbuyan sa maong sakit nga namatay. Dihang nadiskubrehan na ang mga antibiotics kontra mga kagaw gi-master niya ang paggamit niini kontra meningitis.

1950—Nasayod ka ba nga ang mga labing unang makina sa eroplano kaniadto mogamit og tubig aron pabugnawon kini ug aron dili mo-overheat susama sa makina sa mga sakyanan? Si Charles Lainer Lawrance kinsa namatay Hunyo 24,1950 mao ang Amerikanong aeronautical engineer nga midesinyo sa labing una ug malampusong air-cooled aircraft engine. Tungod sa iyang mga desinyo sa makina posible na ang pagtabok sa kadagatan sa Pasipiko ug Atlantiko nga dili na kinahanglan pang motugpa ang mga abyon aron tubilan og tubig aron di mo-overheat. (BANAT NEWS)