Magmika nga enforcers isumbong-Bucao

CEBU, Philippines - Ang chairman sa City of Talisay-Traffic Operation Development Authority (CT-TODA) nga si Bise Mayor Alan Bucao midasig sa publiko nga moduso gyud og pormal nga reklamo ngadto sa iyang buhatan kung dunay mga badlungong traffic enforcer sa siyudad.

Ang maong hagit mitumaw human makadawat og mga impormasyon si Bucao kabahin sa mga traffic enforcers diha sa kadalanan sa Talisay nga nagmika sa ilang mga trabaho.

Matud pa dunay mga motoristang nagbagulbol tungod sa kahuot sa trapiko apan ang traffic enforcer nga nadestino wala lang nagpakabana kay dunay laing gihimo gawas sa iyang trabaho.

Gisaway usab nila ang kawalay maayong pamatasan sa mga traffic enforcers sa Talisay tungod kay bisan nakakita na silang dunay mga senior citizens nga buot motabok dili nalang gyud nila tabangan.

“Kung duna tay complaints let it be put in writing and submit it to the proper authority, whether we like it or not when CT-TODA was conceptualized daghan kaayong reklamo nganong giilisan ang Traffic Commission,” ni Bucao pa.

Apan matud ni Bucao nga bisan og daghan silang nabating reklamo gipaningkamutan nilang masulbad ang problema sa trapiko sa Talisay.

Matud ni Bucao nagkinahanglan usab sila og kooperasyon sa publiko sa pagbaton og disiplina tungod kay matud pa niya bisan maglaray pa ang mga traffic enforcers kung gahi og ulo ang mga motorista mahurot lang ang citation ticket pagsige og isyu.

Gihimong sanglitanan ni Bucao ang Subic, Singapore ug uban pang dagkong siyudad kansang publiko motahod gyud sa lagda sa trapiko. Hinuon giangkon niyang duna gyuy mga motoristang gahi gyud og ulo ilabi na ang pipila sa mga drayber sa traysikol sa dakbayan.  (BANAT NEWS)