Maguwang gipatay sa manghod

CEBU, Philippines - Nagsusama sa nahitabo sa Bibliya nga diin nagpinatyanay ang managsuong sila si Abel ug Cain ang nahitabo usab sa managsuon sa dakbayan sa Mandue dihang gipatay sa manghod ang maguwang niini nga lalaki atol sa ilang panaglalis.

Ang insidente nahitabo diha sa Semse Compound, barangay Tipolo, dakbayan sa Mandaue alas- 6 pasado ang takna sa miaging gabii nga miresulta sa kamatayon ni Eduardo Hernandez, 34, samtang ang suspetsado mao si Alberto Hernandez, 32 , pulos nagpuyo sa maong dapit.

Si SPO1 Reynaldo Urot sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku nga nahinabi sa Banat News miingon nga nagkabikil ang maguwang ug manghod labot sa ilang pamilya.

Tungatunga sa ilang panaglalis mikuha sa tinagoang armas ang manghod ug gipusil ang biktima diha sa tiyan ug sa ubang bahin sa lawas, patay na kini dihang nadala sa Mandaue City Hospital.

Ang suspek nadakpan ra usab dayon sa mirespondeng mga polis ug gikatakdang pasakaan og kaso ugmang adlawa.  (BANAT NEWS)