Cleanup drive sa siyudad ipahigayon karong adlawa

CEBU, Philippines - Liboan ka mga trabahante sa City Hall ug mga volunteers gikan sa nagkadaiyang non- government organizations ang dungan nga manglimpiyo karong adlawa sa mga kasapaan, daplin sa dagat ingon man usab mga kanal.

Kini aron mapalapad ang kampanya sa siyudad sa paglikay sa mga dagkong baha ilabi na nga nagsagunson na ang pagbunok sa uwan.

Motabang usab ang mga opisyal ug mga residente sa nagkadaiyang barangay sa maong proyekto nga mao nay naandang programa sa City Hall.     

Mapasigarbohon usab nga gipahibalo sa head sa Coastal Management Board nga si Peter Cuizon nga mokuyog sa maong kalihukan ang mga tinun-an sa kolehiyo sa nagkadaiyang tunghaan sa dakbayan ingon man usab ang mga sakop sa Philippine National Police.

Gidasig usab ni Cuizon ang tanang residente sa siyudad nga moduyog sa kalihukan karong adlawa pinaagi usab sa pagpanglimpyo sa ilang mga tugkaran ilabi na kadtong namuyo duol sa dagkong kanal ug sapa.

Hangyo ni Cuizon sa publiko nga dili magpataka og labay sa mga basura ngadto sa sapa aron malikayan ang mga paglapaw sa tubig.

Mao na kini ang ika-27 nga coastal cleanup ug ika-23 nga urban clean-up nga gihimo sa siyudad nga himuon matag tulo ka buwan .

Tumong usab sa maong kalihukan mao ang paglikay sa mga sakit sama sa dengue nga mao karon ang usa sa gi-monitor pag-ayo karon sa dakbayan.

Base sa report sa Department of Health-7 nga dunay 6.1 % nga pagsaka sa kaso sa dengue sa Central Visayas gikan sa Enero 1 ngadto sa May 5 karong tuiga kompara sa datos sa susamang period sa miaging tuig.

Gikan sa Enero 1 ngadto sa Mayo 5, 2012, adunay natala nga 2,049 nga kaso sa dengue ug 19 ang nangamatay sa Rehiyon-7 . Sa susama nga period sa miaging tuig, adunay 1,931 ka kaso sa dengue ug 14 ang namatay.  (BANAT NEWS)