Plebisito sa Banawa-Englis-Guadalupe gitakda

CEBU, Philippines - Mahinayon na karong Hulyo 28 ang pagpahigayon sa plebisito aron paghimong buwag nga barangay sa Banawa-Englis gikan sa Guadalupe.

Gibanabanang 28,435 ka mga botante sa barangay Guadalupe ang mobotar og “Yes” ug “No” atol sa plebisito.

“I will vote for Yes,” matud pang kanhi Kong. Antonio Cuenco kinsa maoy niduso sa House Bill 5652 nga naghimo sa Banawa-Englis nga usa ka barangay. Gipasar ang balaudnon isip Republic Act 9905 nga gipirmahan ni kanhi president Gloria Macapagal Arroyo niadtong Enero 7, 2010.

Ang Commission on Elections nipagawas sa kamandoan human gibasura sa Korte ang petisyon nga nagbabag sa pagtakda sa plebisito niadto pa untang Marso 13, 2010.

Nagasto na sa Comelec ang P400,000 sa dihang gimando sa korte ang pagsuspenso sa plebisito human usa ka Victor Buendia ang nipasaka og petisyon. 

Si Buendia molupyo sa Rosalina Village sa Barangay Labangon diin siya na karon ang barangay kapitan miingon sa iyang petisyon nga mahikawan siya isip botante sa iyang barangay sanglit masakop na sa bag-ong barangay Banawa-Englis ang maong dapit.

Apan si Regional Trial Court Judge Gabriel Ingles mibasura sa petisyon ni Buendia. “Hinaut nga wa na’y mobabag niani,” matud pang Cuenco. 

Si Crispin Villarin, pangulo sa United Banawa-Englis Association, Inc. (UBEAI) nagkanayon nga dugay na nilang gipangandoy nga mabuwag sa barangay Guadalupe. 

Base sa resolusyon nga giluwatan sa Comelec, karong Lunes, Hunyo 25 magsugod ang plebisite period diin gidili na ang mga pagdala og armas de fuego ug uban pang gidili matag adunay eleksiyon.  

Sama sa regular nga eleksiyon, ang presinto mobukas alas-7 sa buntag hangtud sa alas-3 sa hapon atol sa botasyon, 60 ka adlaw human sa plebisito, ang Comelec mopahigayun na usab og special election alang sa bag-ong mga opisyal sa Barangay Banawa-Englis kung modaug ang “Yes.” (BANAT NEWS)