CEBU, Philippines - Patay ang usa ka kanhing sakop sa Philippine Air Force human kining gidunggab sa usa ka dispatcher sa sitio Sangi, sa Brgy. Pajo sa dakbayan sa Lapulapu sa milabay’ng gabii. Ang biktima mao si Rodrigo Ceniza, 49, residente sa sitio Seawage sa Brgy. Pusok dakbayan sa Lapulapu kasamtangan nagtrabaho isip usa ka drayber sa traysikol.
Samtang ang suspetsado mao si John Mark Carreon, residente sa sitio Nangka, Brgy. Gun-ob sa maong dakbayan .
Sa imbestigasyon ni PO3 Allan Pantaleon nasuta nga mga alas 7:30 sa milabay’ng gabii si Ceniza gipangayoan og kwarta ni Carreon apan gibalibaran kini hinungdan sa kasuko sa suspek ug miresulta sa pagpanunggab.
Gumikan sa samad dinunggaban nga nahiaguman niini sa iyang ubos nga bahin sa ilok dali kining gidala sa Mactan Benito Ebuen Air Base Hospital apan pipila ka gutlo ang milabay nakabsan gyud kini sa kinabuhi.
Samtang dali usab nga nakasibat ang suspek. Si Ceniza kanhing sakop sa PAF apan sayo nga miretiro sa iyang katungdanan ug namasahero na lang sa iyang traysikol. (BANAT NEWS)