Nabuthan sakop sa rob gang

CEBU, Philippines - Gibutyag sa kapulisan dinhi sa dakbayan sa Sugbu nga sakop sa usa ka grupo sa mga tulisan ang naunay sa gidalang granada sa miaging udto sa bakanteng luna sa sitio Tigbao sa barangay Talamban.

Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) nga nahinabi sa Banat News nagkanayon nga ilang nakumpirmar nga dunay existing warrant sa kasong robbery si Faustino Navarro Jr., 34, taga Punay lungsod sa Aloguinsan.

Si Navarro mao ang nabuthan sa granada ug namatay kinsa unang nailhan sa angga nga ‘Junjun.’

Matud ni Santander nga iyang nahinabi ang hepe sa Aloguinsan Police Station ug kini miingon nga sakop sa usa ka grupo sa mga tulisan si Navarro nga mamiktima bisan mga gagmay’ng tindahan.

Sa nadawat nga text ni Santander, si Faustino Jr., alias “Junjun” nga taga Punay, Aloguinsan, Cebu giingong adunay warrant of arrest sa kasong robbery gikan sa RTC Branch 7 sa sala ni Judge Simeon P. Dumdum. Jr. nga penetsahan og Agosto 1, 2011 apan nakapiyansa niini si Navarro.

Nagduda karon si Santander nga ang grupo ni Navarro posibleng dunay planong tulison ang usa ka bangko diha sa Tigbao nga duol sa gipuy-an niini. Nasuta nga sulod pa lang sa duha ka bulan nga nag-abang si Navarro sa maong dapit. Ang duha niini ka kauban nailhan na usab sa kapolisan apan dili pa ikabutyag ang ilang mga pangalan.

Matud ni Santander nga misulti kaniya si Virgilio Maquiling kinsa kauban ni Navarro nga nadakpan atol sa ginukdanay nga kalit lang mawala si Navarro diha sa giabangan niini sa Tigbao.

Ila usab susihon kun wala ba malambigit ang grupo ni Navarro sa mga banggiitang grupo sa tulisan gikan sa Mindanao. Gawas sa planong pagpanulis sa maong grupo, nagduda usab silang posibling nalambigit sa negosyo sa ilegal nga drugas ang grupo ni Navarro. (BANAT NEWS)