CEBU, Philippines - Usa ka British ang gireklamo sa kanhi niya kapuyo tungod sa pagsulong niini sa ilang panimalay ug gidad-an og sundang sa miaging hapon diha sa barangay Daan lungsod sa Tabogon.
Ang 52-anyos nga Briton (pangalan gipugngan) gireklamo sa iyang kapuyo nga 21 anyos, molupyo sa maong lugar.
Matud pa sa reklamante sa Banat News nga upat na sila ka tuig nga nag-ipon sa maong langyaw diin iyang gihulagway nga usa ka buotan ug malipayong pagpuyo ang ilang natagamtaman.
Sa dihang nakabaton na’g mga higala ang langyaw ug nakat-on og bisyo ilabi na drugas nausab na ang batasan niini ug mangulata na kaniya.
Tungod niini, nakadesider siya nga biyaan ang langyaw ug miuli siya sa iyang inahan apan giapas siya niini nga nagbitbit na og sundang hinungdan nga wala gyud siya mopakita niini. Kagahapong adlawa kuyog ang iyang inahan midangop sila sa buhatan ni Bise-Gobernador Agnes Magpale aron magpatabang.
Ang bise-gobernadora mirekomendar nga mopadangat una sa reklamo ngadto sa Provincial Womens Center ang duha aron ma-estudyohan ang maong insidente ug hatagan og abogado ang duha aron makatabang unsay buhaton. (BANAT NEWS)