LTO ug DTI andam na sa helmet law

CEBU, Philippines - Lig-on kaayo ang teamwork sa mga ahensya sa Land Transportation Office (LTO) ug Department of Trade and Industry (DTI) sa higpit nga pagpatuman sa helmet law sugod sa Agosto 1, 2012.

Sa Kapihan sa PIA kagahapon nga gipahigayon sa buhatan sa DTI7 ug gipalanog sa DYMR Radyo ng Bayan nahimong panelist sila si Regional Director Raul Aguilos sa LTO7 ug Regional Director Asteria M. Caberte sa DTI7   diin gipasalig sa duha ka opisyal nga andam na sila sa pagsikop sa tanang molapas sa balaod bahin sa pagsul-ob sa helmet ug sa matang sa helmet nga gamiton sa tanang sumasakay sa motorsiklo dinhi sa Central Visayas sugod sa Agosto 1.

Matud ni Caberte nga daan nang gipahibawo nila sa publiko nga kutob sa helmet nga walay sticker nga ICC sakmiton ug pahamtangan og silot ang nagsul-ob niini.

Miingon si Caberte nga may mga listahan sila sa brand sa helmet ug sa mga supplier nga akreditado ug gihatagan og katungod nga makapamaligya og helmet nga kalipikadong kapapitlan og sticker sa ICC.

Samtang kadtong may helmet na, ang buhaton sa tag-iya niini isumiter ang maong helmet ngadto sa buhatan sa DTI provincial office aron adto kini didto sukda o ikalibrar kun mosakar ba sa quality standard nga gikinahanglan aron kapapitlan og ICC sticker.

May bayranang P100 ang pagkalibrar, samtang P1.25 ang sticker, matud pa ni Caberte.

Samtang sa bahin ni Aguilos kini mibahad nga isip tigpanakop, ang LTO uban sa mga deputized agent niini nga mga polis, opisyal sa lokal nga kagamhanan ug mga pribadong indibiduwal nga gihatagan og katungod sa pagpanakop, wala nay pasayloon kutob sa molapas sa balaod. Matud pa ni Aguilos nga sa mga driver sa habal-habal, higpit nga ipatuman ang balaod nga kinahanglang usa ra ang gitugot nga pasahero nga ikarga nila nga may helmet usab. Sa higayong masakpan sila nga magkarga og pasahero nga way helmet, pabayron sila og multa nga P1,500. Sa matag pasahero gikan sa ikaduha ngadto sa 10 gawas sa drayber, nga ikarga sa usa ka biyahe sa habal-habal, matag usa may multa nga P1,500, unya laing Pl,500 nga multa kun way helmet nga mosangpot sa pagkabangkarota sa matag operator sa maong matang sa pasaheroang sakyanan nga gahi og ulo. (BANAT NEWS)