P5mil nga fuel subsidy sa garbage trucks pahigpitan

CEBU, Philippines - Gisugyot nga higpitan ang pagpanghatag og binuwang P5,000 nga fuel ug maintenance subsidy sa mga trak sa basura sa kabarangayan sa dakbayan sa Talisay human dunay mga reklamong wala kini gamita sa hustong katuyoan.

Si Konsehal Romeo Villarante sa oposisyon mibutyag nga kinahanglang dunay klarong gigamitan ang maong mga trak ug mao lamang ang paghakot og mga basura.

Niing bag-o lang, ang presidente sa Association of Barangay Council (ABC) nga si Charles Basillote nangayo og budget gikan sa mayor alang sa subsidy sa gasolina ug maintenance sa garbage trucks sa kabarangayan.

Sa gipahigayong regular session sa konseho niadtong Martes si Villarante nagkanayon nga dili siya supak sa paghatag og subsidy apan kinahanglan nga ipasubay kini sa performance basis.

Sumala pa niya dako kaayo og ikatabang sa kabarangayan apan nagkinahanglan usab nga dunay klarong polisiya ang paghatag niini sa 22 ka barangay nga diin 15 lang ang dunay garbage truck.

Si Basillote kinsa kapitan sa barangay Dumlog uyon usab kini sa tumong ni Villarante aron dili maabusohan ang paghatag og subsidy, kun maaprubahan unya ang iyang hangyo makigtigom siya sa kabarangayan.

Si Konsehal Val Ylanan ug Danny Caballero miawhag nga gamiton lang gyud ang garbage trucks sa paghakot og basura tungod kay dunay mga higayon nga gigamit kini sa pagpangaligo og dagat ug paghatud og patay.

Base sa Commission on Audit (COA) nga ang paggamit sa sakyanan sa gobiyerno nga dili haom sa kagamitan niini nakalapas kini sa COA Circular No. 75-6 nga nagkanayon “government motor vehicles should be used strictly and exclusively for official business.”  BANAT NEWS