PHILSCA nangandam sa NSED

CEBU, Philippines - Gisugdan niadtong adlaw’ng Martes sa mga sakop sa Lapulapu City Fire Department ang duha ka adlaw nga training sa Fire ug Earthquake drills sa mga tunghaan sa kolehiyo sa dakbayan sa Lapulapu. Matud pa ni Lapulapu City Fire Investigator SFO1 Atilano Berido ang maong lakang isip pagsanong sa hangyo ni Dr. Bernard Ramirez ang Presidente sa Philippine State College of Aeronautics (PHILSCA) ug Dr. Nonadel Alvarado Soriano ang PHILSCA Campus Director sa Mactan Benito Ebuen Air Base sa dakbayan sa Lapulapu.

Sumala pa ni Soriano human nila madawat ang memorandum gikan ni Dr. Ramirez nakig-coordinate sila sa Lapulapu City Fire Department alang sa maong kalihukan.

Samtang si OIC Lapulapu City Fire District Marshal Supt. Oscar Mayol mitahas nila ni SFO1 Atilano Berido, FO2 Climaco Salisid ug FO2 Ceasario Ceniza nga modumala sa maong training.

Base sa memorandum ni Ramirez ang pagpaubos sa training sa mga tinun-an sa kolehiyo kabahin kini sa programa ni Commission on Higher Education Commissioner Patricia Licuanan penetsahan og Hunyo 8, 2012.

Ang kamandoan ni Licuanan nagmando sa tanang mga colleges ug universities lukop nasud sa pagpahigayon og training, lecture ug dry run kalabot sa paglikay sa sunog ug linog. Karong umaabot nga Hunyo 29, 2012 ipahigayon ang “Nationwide Simultaneous Earthquake Drill” o (NSED) sa tanang mga state colleges ug universities hinungdan sa pagpangandam sa mga tinun-an sa lima ka sangang tunghaan sa PhilsCA lukop nasud.

Matud pa ni Soriano lakip sa motabang unya sa maong kalihukan mao ang mga ambulansya ug fire equipment sa Philippine Air Force sa umaabot nga NSED. BANAT NEWS