Lisensya 'gipakuot' sa fixer

CEBU, Philippines - Usa ka drayber naproblema karon kay naglisod siya sa pagpa-renew sa iyang lisensya human niya “gipakuot” sa hilom ug wala bayri ang multa sa nahimo niya nga kalapasan.

Magul-anon kaayo ang maong drayber nga miduol ni Eddie Mata, ang hepe sa Land Transportation Office (LTO) sa dakbayan sa Danao pagkasayod niya nga dili ma-renew ang iyang lisensya hangtud nga ma-settle ang alarma didto sa LTO.

Giangkon sa maong drayber, ngalan gipugngan lang, nga human siya madakpi kaniadtong nagmaneho pa siya og sakyanan nga expired na ang rehistro, wala niya bayri ang iyang P4,078 nga multahan.

Ang gihimo sa maong drayber igo lang niya nga gibayran ang fixer sa kantidad nga wala makaabot sa multa aron makuha ang iyang lisensya. Wala mosipyat ang gisugo sa drayber nga nabalik ra kaniya ang iyang lisensya.

Ang wala masayri sa maong drayber nga bisan og nakuha niya ang iyang lisensya apan nagpabilin nga wala matangtang sa computer ang iyang nahimo nga kalapasan nga wala mabayri. Kun tinud-on sa kadagkoan sa LTO paghimo og imbestigasyon kining maong isyu mahimo nila nga kontakon si Mata aron masayran nila kinsa ang maong drayber nga nakakuha sa lisensya nga wala makabayad og multa.

Usa ka tinubdan sa Banat Manobela mitug-an nga dunay mga kaso nga ingon niini diha sa LTO nga ang lisensya makuha ra gihapon bisan og ang tag-iya dili mobayad og multa.

Hinuon, ang kadagkoan sa Commission on Audit (COA) nag-estrikto na karon sa ilang pagtan-aw sa mga transaksyon sa LTO aron malikayan ang mga binuang sa pipila ka kawani. Ang Banat Manobela moawhag sa mga drayber nga madakpan sa mga road law enforcers nga makahimo og salaud nga dili mopakuot sa ilang lisensya kay maisip ra gihapon nga doble pa ang ilang mabayran ug mograbe ang ilang problema.

Nabantayan sa Banat Manobela nga bisan og giestrikto sa LTO ang kampanya sa mga fixers, apan anaa gihapon nag-operate ang pipila ka fixers sa sulod sa compound. (BANAT NEWS)