Gwen supak Sto. Niño tangtangon

CEBU, Philippines - Kusganong gisupak ni Governor Gwen Garcia ang gisang-at nga balaodnon ni Kabataan partylist Representative Raymond Palatino sa ubos balay balaoranan nga magtangtang sa mga santos ug mga rebulto sulod sa buhatan sa gobiyerno.

 Matud pa sa gobernador nga wala siya makauyon sa House Bill 6330 o the Religious Freedom in Government Offices Act kay buot niining hilabtan ang naandan nang kinaiya ug batasan sa mga Filipinong Katoliko sa pagyukbo sa mga larawan sa balay man o sa mga opisina nga iya sa goberno ilabi na nga mayoridad sa mga nanagtrabaho sa goberno dinhi sa nasud pulos Katoliko.

Ang gobernador miingon nga nahimong sentro sa Kristiyanismo ang lalawigan sa Sugbo kay dinhi man magsugod ang pagtudlo sa mga Katsila sa tinuhoang Katoliko   diin pagsimba sa larawan  maoy usa sa dugokan aron molig-on ang tawo sa iyang pagka-Katoliko.

Labaw sa tanan nagkanayon ang gobernador nga sa dili mga Katoliko wala sila pugsa sa pagsalmot sa mga seremonyas nga relihiyoso ilabi na sa mga kalihokan nga gipahinungod sa larawan.

Midugang siya nga mirespeto ang mga Katoliko sa di mga Katoliko nga nanarbaho usab sa mga opisina sa goberno ug kamatuoran niini malinawon kaayo ang panag-uban sa mga trabahante nga Katoliko ug di Katoliko sa tanang buhatan sa gobiyerno.

Dugang pa sa gobernador nga dili malangkat sa iyang buhatan ang imahe sa Sr. Sto. Niño kay mao kini magpahinumdom sa iyang debosyon ug nagtimaan nga kini mao kanunay maghatag og proteksyon sa Sugbo.

Gani nasuta sa gobernador nga si Sr. Sto. Niño maoy silbing Dios dinhi sa Sugbo tungod sa dako niining nahimo ngadto sa mga Sugboanon ilabi na sa mga katalagman sama sa bagyo, linog, baha , sunog ug uban pa.

Ang House Bill 6330 or the Religious Freedom in Government Offices Act nga gipanday ni Palatino gihimo aron idili na ang mga Misa, Christmas party, thanksgiving, vigils, blessings, ug ang pagbutang sa mga Imahen sa mga Santos sa mga govenrment offices ug sa bisan unsang mga butang nga may kalambigitan sa Relihiyon tungod kay dili angayan nga mopabor ang estado sa usa ka relihiyon.

Apan bisan pa kun mao pay pagsang-at sa maong balaodnon, nakadawat na kini og daghang pagsupak gikan sa Simbahang Katoliko ilabi na gayud sa mga Cebuano sama ni Gobernador Garcia nga dako og pagtuo sa balaang Bata, Senior Santo Niño nga maoy giisip sa mga Sugbuanon nga nagprotektar sa Sugbo gikan sa mga katalagman.

Gibasi sa nangamahan sa maong balaodnon ang giingon sa Biblia nga ang Dios abubhoan ug gikasilagan Niya ang tawo nga misimba sa binuhat sa tawo kay Kaniyang magbubuhat.(/WC)(BANAT NEWS)