Mananagat sa Boljoon mitiyabaw vs illegal fishing

CEBU, Philippines - Dul-an sa usa ka gatos ka mga mananagat sa lungsod sa Boljoon ang miduso og pormal nga reklamo sa buhatan ni Gobernador Gwendolyn Garcia ug sa buhatan sa Anti-Illegal Fishing Commission sa Kapitolyo batok sa mga opisyal sa lungsod ilabi na sa mga sakop sa Bantay Dagat tungod kay walay nahimo sa pagsumpo sa ilegal nga pagpanagat sa lungsod.

Sentro sa ilang gireklamo ang duha ka mga opisyal sa Bantay Dagat ingon man ang kapolisan nga gihulagway nilang nagpakabuta-bungol sa mga ilegal nga pagpanagat sa ilang lungsod. Ang mga reklamante misumbong nga upat ka mga insidente sa pagpanagat sa “Kubkob” nga panagatan diha sa ilang lungsod ang nahitabo niadtong Mayo 28 ug 30 ug nausban pa kini niadtong Hunyo 1 ug Hunyo 11.

Usa sa mga reklamante nga si Manny Derama nga taga lungsod sa Boljoon dihang nahinabi sa Banat News nagkanayon  nga niadtong Mayo 28 nakakuha ang kubkob og kapin 200 ka banyerang isda ug laing gatusan ka banyerang isda niadtong Mayo 30. Gibanabana usab niyang moabot sa 2 mil ka banyerang isda usab ang nakuha sa maong panagatan sa bulan sa Hunyo diha sa ilang kadagatan ug dihay higayon nga tungod sa kadaghan sa mga isda gipanglabay lang sa dagat ang mga nakuhang gamay nga isda kay wala na silay kasudlan.

Giawhag sa grupo ang mga opisyal sa Kapitolyo ilabi na ang Anti- Illegal Fishing Commission pagsumpo sa naghitak nga illegal fishing sa ilang lugar tungod kay nabalaka silang makulban sa panginabuhian ang gatusang gagmay’ng mananagat.

Apan ang hepe sa Boljoon Police nga si Insp. Rico Emperwa dihang nahinabi sa Banat News miangkon nga dunay mga nasigpatang illegal fishing sa ilang lugar apan dili gyud makonsiderar nga naghitak na kini.

Ang Banat News misuway pagkuha sa habig sa mga pangulo sa Bantay Dagat sa Boljoon nga si Crisostomo Derama apan wala kini sa iyang buhatan sanglit atoa kini sa bukid samtang atoa usab sa barangay Balitang ang Bantay Dagat coordinator nga si Jun Pal-eng sumala pa sa nakatubag sa telepono diha sa munisipyo. (BANAT NEWS)