CEBU, Philippines - Patay ang usa ka kaslonong lalaki ug grabe naangol ang kauban niini samtang namatay usab ang usa ka barangay kapitan sa lungsod sa Dalaguete sa duha ka managlahing aksidente sa kadalanan niadtong adlaw’ng Lunes ug Martes.
Sa lungsod sa Catmon, dili na makaatubang sa altar aron pakaslan ang iyang hinigugma ang 25 anyos nga si Gerebese Jeffrey Angel, taga barangay Umapad sa dakbayan sa Mandaue human kini makabsi sa kinabuhi dihang napunggit ang ilang gisakyang motorsiklo sa usa ka mini-truck.
Naangol usab ang angkas ni Angel nga si Cerilo Berdejo, 21, sa maong aksidente diha sa National Highway sa barangay Daan-Catmon, lungsod sa Catmon.
Ang gikasungag sa duha gimaneho ni Lalona Angeles Estomago, 37, taga barangay Guimbuangan sa lungsod sa Pinamungajan kinsa mitahan sa iyang kaugalingon ngadto sa kapolisan human sa aksidente.
Si PO1 Ralph Bracero sa Catmon Police Station nga nahinabi sa Banat News miingon nga gikan pa sa lungsod sa Tuburan ang mga biktima ug namalit og baboy nga mao untay ihawon sa kasal ni Angel sa sunod bulan.
Ang duha paingon nang mopauli sa Mandaue dihang paghidangat sa maong dapit gikasungag nila ang sakyanan ni Estomago nga paingon sa amihanan.
Si Angel gikatahong maoy nagrabehan ug patay na pag-abot sa Vicente Sotto Memorial Medical Center sa dakbayan sa Sugbo samtang talandugon ang kauban niini.
Samtang sa laing aksidente, namatay sa tambalanan ang barangay kapitan sa barangay Tapon nga si Antonio Virganio, 61, human kini naligsan og pribadong sakyanan sa iyang paglabang sa karsada diha sa sitio Panaguikan sa ilang barangay sa lungsod sa Dalaguete niadtong Lunes sa alas 7:00 sa gabii.
Si Virganio maoy kasamtangang kapitan sa maong barangay ug usab kanhi konsehal sa lungsod sa Dalaguete napunggit sa usa ka awto nga gimaneho ni Rodnel Ponce, 25, taga barangay Candabong lungsod sa Argao ang gitumbok nga nakaligis sa biktima.
Matud ni PO3 Christopher Requina sa Dalaguete Police Station dihang nahinabi sa Banat News padulong na pauli si Ponce gikan sa lungsod sa Alcoy samtang ang biktima mao pay pagkanaog gikan sa bus gikan sa dakbayan sa Sugbu.
Apan sa paglabang ni Virganio sa kalsada wala kini makabantay sa naghaguros nga pribadong sakyanan tungod kay giingong naalihan man ang iyang panan-aw sa pikas lane sa bus nga gikanaogan sa biktima.
Sumala pa sa kapolisan maayong pagkadaro sa maong barangay official sulod sa pipila ka metros una pa hingpit nakahunong si Ponce.
Daling gidala sa Alcantara Memorial Hospital sa lungsod apan tungod sa kagrabe sa kadaot nga nahiaguman gibalhin kini sa South General Hospital sa siyudad sa Naga apan kagahapon sa kaadlawon gikatahong nakabsan kini sa kinabuhi.Si Ponce malinawong mitahan sa kapolisan human sa aksidente.(/EIM)(BANAT NEWS)