Annabelle Rama mokandidato gyud

CEBU, Philippines - Nakigtagbo si Annabelle Rama sa pipila ka mga leader sa Team Rama kagahapon sa usa ka restaurant sa Siyudad sa Sugbo diin iyang gipahibawo nga mokandidato gyud siya sa pagka-kongresista sa amihanang bahin sa dakbayan sa Sugbo.

Apan sa pagkakaron gipaabot pa niya ang resulta sa survey nga iyang gihimo kun may purohan ba siyang modaog sa umaabot nga election sa 2013. Pipila sa mga mitambong sa usa ka paniudto nga gidalit sa artistang Sugboanon mao sila si Kapitan Rey Oybenes sa Barangay Mabini ug ang acting barangay captain sa Talamban nga si Ronald Caminade ug si konsehal George Chang sa Kasambagan. Nagdumili hinuon si Rama sa pagbutyag sa iyang plata porma apan misaad nga iya kining ipabuhagay sa dili madugay ngadto sa mga katawhan sa maong distrito.

Dugang pa niya nga nakadawat na siya og daghang tawag gikan sa iyang mga higala nga padaganon gyud siya aron mahunong na ang pagdumala sa mga del Mar sa north district. Susama og baruganan si Annabelle ug si Mayor Michael Rama nga iyang ig-agaw sa pagsupak sa katukoran sa daghang flyover. Iya usab nga gibutyag nga nagkaabot sila si Congresswoman Cutie del Mar didto sa hotel sa America nga gisak-an ni Manny Pacquiao sa sangka niini batok ni Timothy Bradley niadtong Hunyo 10, 2012 apan wala sila magkatinagdanay kay wala siya makaila kang Cutie sa personal, matud pa ni Annabelle. (BANAT NEWS)