CIDG mosusi sa pagkalumos

CEBU, Philippines - Mopahigayon og linaing imbestigasyon ang Criminal Investigation and Detection Group (CIDG-7) bahin sa duha ka kaso sa pagkalumos sa miaging semana nga nahitabo diha sa usa ka beach resort sa dakbayan sa Lapulapu.

Si Sr. Supt. Jose Pante, mitug-an sa mga tigbalita nga iyang gimanduan ang CIDG-7 investigation section gipangulohan ni Chief Inspector Patrick Fredie Vaño nga mopahigayon og imbestigasyon inabagan sa mga sakop usab sa CIDG sa Metro Cebu.

Matud ni Pante wala na siya magpaabot pang mandoan gikan sa Campo Crame nga mohimo’g imbestigasyon ug iyaha lang kaugalingong inisyatiba paghimo niini.

Usa sa ilang tutokan sa imbestigasyon naglakip sa safety measures nga gisasop ug gipatuman sa resort management. Sa sayo pa niini, ang konseho sa dakbayan sa Lapulapu mipadayag usab nga mohimo sila og kaugalingon imbestigasyon tungod kay duha na ka tawo ang nagsunod nga nangalumos sa maong beach resort sa miaging semana.

Si Lapu-Lapu City Mayor Paz Radaza uyon usab nga dunay imbestigasyong himuon.

Si Chebar Albores, acting manager sa Portofino Beach Resort, sa sayo pa niini miingon nga ilang gihangop ang imbestigasyon aron paglimpiyo sa mga pagduda ug molutaw ang kamatuoran nga wala sila magkuwang sa safety measures alang sa ilang mga parokyano.

Lakip na niini ang pagdili sa mga guest nga nakainom og bino sa pagkaligo, wala na usab sila mamaligya og beer gikan sa alas-6 sa gabii human sa nahitabo niadtong Hunyo 6 diin ang 22-anyos nga tinun-an sa kolehiyo nalumos.

Matud ni Pante ang lifeguards ug watchers importante usab kaayo sa resort.

(BANAT NEWS)