Maestro nangawat og alahas priso

CEBU, Philippines - Mikagulkol sa prisohan ang usa ka magtutudlo human kini hisakpi sa iyang langyaw’ng estudyante nga miunay og kawat sa alahas   sa naulahi sa gipuy-an niining Pension House sa barangay Maribago, dakbayan sa Lapulapu sa milabay’ng gabii.

Ang nag-atubang og kasong pagpangawat giila sa kapolisan nga si Jerry Ycong, 28, ulitawo, residente sa Barangay Pajo, dakbayan sa Lapulapu ug usa ka tutor sa English.

Atol sa imbestigasyon, si Shavanova Esenia, 27, usa ka Russian national nga gitudloan sa suspek og Inenglis mitug-an sa kapolisan sa Theft and Robbery Section nga sa milabay’ng semana nawad-an siya og mga alahas sulod sa iyang lawak.

Busa iyang gipan-an og i-pod ug alahas ang ilang sala ug sa alas 7:15 sa milabay’ng gabii iyang nakita si Ycong nga mikuha sa gipaon niyang bulawang pulseras nga mobalor og 3 mil dolyares nga iyang gibutang ibabaw sa iyang television.

Dihadiha mitawag dayon   ang biktima sa estasyon sa kapolisan ug gipadakop si Ycong ug gibalhug dayon kini sa detention cell sa kapolisan sa dakbayan sa Lapulapu.

Nagduda si Esenia nga si Ycong maoy mikuha sa iyang bulawang singsing sa milabay’ng semana hinungdan nga iya kining pasakaan og kasong pagpangawat.