CEBU, Philippines - Naangol ang duha ka tawo human kini panunggaba sa managlahing lugar ning dakbayan sa Sugbo sa miaging Domingo.
Ang mga biktima mao sila si Lester Inot,18, ulitawo, drayber sa traysikad, nga taga sitio Kalubihan sa barangay Talamban, ug si Romero Tuñacao alyas Meloy, 34, ulitawo, nga taga sitio NGA, barangay Lahug pulos ning siyudad sa Sugbo.
Ang suspetsado nga miluba kang Inot ginganlan lang og Erac, nga nagpuyo sa Talamban, samtang ang midunggab kang Tuñacao mao si Rafael Donan, 27, usa ka security guard nga sakop sa Café Security Agency.
Nasayran gikan kang SPO4 Rey Cuyos sa Homicide Section nga si Inot mibisita sa iyang pag-umangkon sa Kalubihan, Talamban ug nakig-inom kini sa amigo niyang si Sisoy sa daplin sa karsada sa maong lugar.
Apan dihang mopauli na unta ang biktima, kalit kining gisumbag sa suspek dayon gidunggab pinaagi sa icepick.
Samtang si Tuñacao, kinsa giingong hubog kalit lang mitipon sa grupo sa suspek nga si Donan kinsa nakig-inom sa iyang mga amigo nga sila Nestor Barro, Dionesio Sarita , sa sala sa balay ni Roy Lawan.
Unya gumikan sa malagmit sa kalasbag na, nagkalalis kini og si Sarita bahin sa gidiling drugas ug gisumbag niini ang naulahi.
Ang suspek nga naglagot milanit usab sa iyang kutsilyo dayon giluba ang biktima.
Ang duha ka biktima sa pagpanunggab pulos nadala sa tambalanan , samtang sa duha ka mga suspek, si Donan ray misurender sa kapolisan samtang si Erac gipangita pa sa mga otoridad human kini mosibat. (BANAT NEWS)