Kwarter sa bomb squad sa Centcom nasunog

CEBU, Philippines - Niulbo ang sunog diha sa kuwarter sa bomb squad sa Explosive Ordnance Disposal Detachment diha sa Central Command headquarters sa barangay Lahug ning siyudad sa miaging gabii.

Ang maong kwarter ginama lang sa mixed materials nga yanong gilamoy sa kalayo lakip na ang canteen ug military mini-cruiser jeep ug mipaulbo sa pipila ka mga gipanghipos nga mga bomba.

Si Lt. Col. Christopher Tampus, tigpamaba sa Centcom, nagkanayon nga wala hinuoy ekipo sa bomb disposal ang naapil sa pagkasunog.

Gidugang ni Tampus dunay personnel nga nakadungog og duha ka kusog ug lanog kaayong buto apan mohimo pa sila og inventory niini kun mga vintage bombs ba ang mibuto atol sa maong sunog.

Gibanabanang moabot ngadto sa P75 mil ang danyos nga gituohan sa kabomberuhan nga electrical misuse ang hinungdan.  

Ang Centcom mohimo usab og kaugalingong imbestigasyon ug ila usab gihangyo ang kapulisan nga mohimo usab og linaing imbestigasyon sa maong sunog.             

Wala hinuoy gikatahong dunay naangol sa maong sunog diin lima ka minutos nga nagsugod ang sunog una pa nakaresponde dayon ang kabomberohan nga naglakip sa firetruck sa Apas.

Si SFOI Nilo Daculan, imbestigador sa Cebu City Fire Department nagkanayon nga diha nagsugod sa ibabaw nga bahin sa maong building ang sunog ug ilang susihon kun ang linya sa kuryente ba ang hinungdan.

Matud ni Daculan nga pasado alas-11 sa gabii nila nadawat ang alarma ug hingpit nilang nakontrolar sulod lamang sa 30 minutos. Giangkon ni Sr. Supt. Aderson Comar nga karaan na usab kaayo ang linya sa kuryente diha sa maong building. (BANAT NEWS)