Cabarrubias di mobiya sa BOPK

CEBU, Philippines - Giangkon ni Konsehal Roberto “Bob” Cabarrubias nga giimbitar siya ni Mayor Michael Rama nga motapon sa Team Rama apan iyaha kini nga gibalibaran gumikan kay loyal siya sa Bando Osmeña Pundok Kauswagan nga gipangulohan ni Kongresista Tomas Osmeña

Matud pa ni Cabarrubias nga maglisod siya og biya sa BOPK gumikan kay mao na kini ang gisandigan niyang partido sukad misulod siya og politika 18 ka tuig na ang milabay.

Mapasalamaton hinuon ang konsehal ni Mayor Rama sa gihatag nga pagsalig niini ngadto kaniya.

“Nagpasalamat ko sa mayor , kay nakita gyud niya nga nitrabaho gyud ko dinhi sa City Hall. Nag-estorya na mi niya, ug mapasalamaton ko kay nakasabot ra siya sa akong desisyon,” matud pa ni Cabarrubias.

Dugang pa ni Cabarrubias nga dili makaapekto ang iyang trabaho bisan dili sila pareho og partido sa mayor. Nagkanayon ang konsehal nga kanunay niya nga tambongan ang mga kalihukan sa City Hall sanglit parte man kini sa iyang trabaho. Kahinumduman nga si Cabarrubias maoy gihugon-hugon sa miaging buwan nga mobalhin sa Team Rama gumikan sa kasuod niya sa mayor busa iyaha kining gitin-aw kagahapon. (BANAT NEWS)