2 Tawo gipatay sa Lapu'

CEBU, Philippines - Duha ka mga tawo ang gipamusil patay sa managlahing insidente sa dakbayan sa Lapulapu niadtong milabay’ng gabii.

Pasado alas-7 sa gabii niadtong Domingo, usa ka Isabelito Berame, 48, ang gipusil patay sa duha sa tulo ka wala mailhing mga lalaking luwan og motorsiklo kalit nga nanulod sa basketbolan sa sitio Soong 1 sa barangay Mactan ug mipusil sa biktima.

Si Insp. Zenaido Pastorfide ang hepe sa Homicide Section nga gikahinabi sa Banat News mibutyag nga nagtan-aw og basketball sa mga bata ang biktima dihang kalit nga miabot ang usa ka motorsiklong giluwanan sa tulo ka mga lalaki diha sa ganghaan sa basketball court.

Sumala pang Pastorfide nanulod ang duha ka mga lalaki ug miduol sa biktima dayong pusil niini upat ka higayon diha sa dughan. Matud pang Pastorfide patay na pag-abot sa Mactan Doctors Hospital.

Human sa pagpamusil daling mibalik ang mga mamumuno sa nagpaabot nga kaubang luwan sa motorsiklo ug mibiya sa lugar. Matud pang Pastorfide kalibre .45 pistola ang gigamit sa mga kriminal.

Nagduda si Pastorfide sa nagpaluyong motibo sa maong krimen gumikan kay dili ordinaryong armas ang gigamit sa mga gunmen.

“Wala gyud ni siya kaila (sa mga killers) kay kung nakaila pa siya nidagan na ni siya pagkakita nila,” matud pang Pastorfide kinsa midugang nga ila pang susihon ang background sa gipatay sanglit sa pagkakaron ‘buotan’ kini mao ray paghulagway kaniya sa mga kabanay.

Usa ka oras ang milabay, laing pagpamusil ang nahitabo nga miresulta sa kamatayon sa usa ka 26- anyos nga lalaking nag-estambay atubangan sa Bankal Elementary School sa barangay Bankal sa mao gihapong dakbayan.

Ang namatay mao si Wilfredo Palomar, samtang gitumbok nga mipusil kaniya mao ang usa ka Expedito Noval, 19, nagpuyo sa maong dapit.

Si PO1 Michael Vincent Monares sa homicide section sa kapolisan sa maong dakbayan nga nahinabi sa Banat News miingon nga nagsulatsulat ang biktima sa kural sa maong dapit ginamit ang pintal.

Ang suspetsado nga nakasigpat sa gihimo sa biktima dali nga miduol ug mitukmod dayong pusil sa armas nga wala pa matino ang kalibre.

Matud pang Pastorfide kalit nga gitukmod sa suspek ang biktima ug gipusil kini sa dughan ug daling miikyas.

 Nagtuo si Pastorfide nga dunay karaang panagbangi ang duha kaniadto.

Gidala unta sa Lapulapu City District Hospital ug gibalhin sa Vicente Sotto Memorial Medical Center apan gideklarar kini sa mga doktor nga dead on arrival.  (BANAT NEWS)