Sa kasaysayan karon

Hunyo 19

 CEBU, Philippines - 1908—Giestablisar ang University of the Philippines pinasikad sa Act No. 1870 o “University Act” sa Philippine Commission o First Philippine Legislature ilawom sa awtorisasyon sa Estados Unidos. Sa Senate Resolution No. 276 sa Senado sa Pilipinas ang UP maoy giilang "the nation’s premier university". Gani pito sa kinse ka nangaging presidente sa Pilipinas nakatungha sa maong unibersidad, 12 ka Chief Justices sa Korte Suprema, 36 gikan sa 57 ka gideklarar nga mga National Artists ug 34 gikan sa 35 ka National Scientists ang nag-agi sa maong unibersidad.

1933—Natawo si Viktor Ivanovich Patsayev ang Soviet cosmonaut ug design engineer sa Soyuz 11 mission. Siya kauban sa mission commander nga si Georgy Dobrovolsky, ug flight engineer Vladislav Volkov mao pay tawong nakapundo sa kawanangan sulod sa 24 ka adlaw nga nagpahigayon og ekspiremento sulod sa Salyut station. Apan sa ilang pagbalik sa yuta niadtong Hunyo 29, 1971 namatay silang tulo sa sulod sa cabin sa Soyuz 11 dihang nihungaw ang pressure sa maong spacecraft.

1924—Gipanganak ang Amerkanong electrical engineer nga si Raymond Noorda ang giilang amahan sa ‘computer networking’ nga responsable sa pagkonektar sa mga personal computers ngadto sa mga kaubang computers sulod sa usa ka kompanya. Dili siya maoy nakaimbento sa local area network (LAN) nga diin ang mga computers mahimong malili o maka-share of files sa ubang computers ug makagamit sa centralized printers pinaagi sa mga cable o antenna. Apan isip chief executive sa Novell Inc (1983-94), gihimo niyang labing unang PC Network operating system ang ilang NetWare brand software. Bisan ang dili kaparehas o compatible nga computers nahimo niyang makonektar pinaagi niini hinungdan nga naestablisar niya ang standardization sa mga networks sa mga kompanya tungod kay nagtuo siyang ang kooperasyon sa nagkadaiyang computer companies magbunga og maayo sa negosyo. (BANAT NEWS)