Drayber sa habalhabal gi-ambush patay

CEBU, Philippines - Gipusil patay samtang namasahero ang drayber sa habalhabal   nga gipasanginlang nalambigit sa pagpanglungkab sa sitio Tawog, barangay Valladolid sa siyudad sa Carcar niadtong Domingo sa alas 5:35 sa hapon.

Ang biktima mao si Roldan Navarro, 37 , nagpuyo sa maong lugar, samtang padayon pang giila sa kapolisan ang mamumuno niini.

Matud ni PO1 Japhet Saavedra sa Carcar City Police dihang nahinabi sa Banat News namasahero ang biktima dihang pag-abot sa nahitaboan kalit kining gipusil ug natumba.

Ang biktima gisuwayan og dala sa mga tawo sa Carcar City District Hospital apan gideklarar kini sa attending physician nga si Dr. Allan Mercado nga dead on arrival (DOA).

Ang kapulisan padayon pang nagsusi sa motibo ug kun si kinsa ang mamumuno niini, nagduda hinuon ang mga polis nga posibleng panimalos ang motibo sanglit nakadawat sila og inpormasyong nalambigit kaniadto ang biktima sa pagpanglungkab sa usa ka panimalay. (BANAT NEWS)