Wala ulia sa asawa naghikog

CEBU, Philippines - Patay ang usa ka lalaking minyo human naghigot og pisi sa iyang liog nga gituohang naghikog sulod sa kwarto sa pinuy-anan niini kagahapon sa alas-5 sa buntag diha sa dalan Spollarium St., sitio Buli sa barangay Duljo Fatima ning siyudad.

Si Niño Datuin Abelgas, 36, walay trabaho ug nagpuyo sa maong lugar napalgan sa iyang inahan nga patay nga naghigot og pisi sa iyang liog samtang ang pikas tumoy gihigot sa kisame.

Ang mga tanod sa maong lugar pinangulohan ni Riben Vasayllaje ug mga kaubanan maoy unang miresponde apan wala na matabang si Abelgas.

Sa pasiunang imbestigasyon ni SPO4 Rey Cuyos ug mga kaubanan sa Homicide Section nagbutyag nga ang inahang si Sally paingon mangutaw sa uniporme sa iyang duha ka apo nga anak ni Niño dihang nadiskubrehan niya ang anak nga nagbitay na sa kisame.

Dugang impormasyong nakuha sa kapolisan nga daw naguol si Niño tungod kay panagsa nang mouli sa ilang balay ang kapikas nga nagtrabaho sa usa ka massage parlor sa dakbayan sa Mandaue.(/EIM) (BANAT NEWS)