CEBU, Philippines - Patay ang usa ka lalaki human madakdak ang ulo ngadto sa sementadong karsada dihang ang motorsiklo nga iyang giangkasan nadagit sa hit and run nga multicab sa dalan Mabini sa barangay Poblacion, dakbayan sa Danao alas-6 pasado ang takna sa buntag niadtong miaging adlaw.
Ang biktima mao si Edlito Hermoso, 31, taga barangay Tabok Kamalig Bato sa maong dakbayan kinsa angkas sa motorsiklo nga gidala ni Novie Bonjoc, 27. Si PO1 Ramil Costan, imbestigador sa traffic section sa Danao Police Station nga nahinabi sa Banat News miingon nga gikan sa amihanan ang motorsiklong giluwanan sa biktima ug paingon sa barangay Poblacion.
Matud pang Costan nagbunok ang ulan atol nga nagkasugat sila si Hermoso ug ang kusog kaayong nagdagan nga multicab nga nakadagit kanila, tungod kay dangog ang dalan ug kusog ang pagkadagit kanila nalamba ang motorsiklo sa sementadong karsada.
Imbes nga mohunong mipaturatoy hinuon og padagan palayo ang drayber sa maong multicab ug wala na maabti pa.
Gitug-an ni Costan nga wala usab magsul-ob og helmet ang biktima nga nagputos og plastik sa iyang kalawasan sa pagpanalipod nga dili mahumod sa ulan samtang wala maunsa ang drayber sa motorsiklo nga si Bonjoc kinsa nagsuot og helmet ug nagputos usab og plastic sa iyang lawas.
Pakyas usab si Bonjoc pagtino sa kolor ug plaka sa multicab tungod sa kakalit sa hitabo ug pagkalamba nila. (BANAT NEWS)