CEBU, Philippines - Ang Commission on Elections (COMELEC) mipasalig nga ang mga piniriso sa Cebu Provincial Detention and Rehabilitation Center (CPDRC) makabotar sa sulod sa maong bilanggoan busa dili na kinahanglang mogawas pa sila aron sa pagbotar sa umaabot nga election.
Kini tungod kay ang COMELEC mobutang og usa ka special polling place sa sulod sa CPDCRC diin ang mga binilanggo adto mokasar sa ilang boto.
Si COMELEC Commissioner Rene Sarmiento miduaw sa CPDRC sa miaging adlaw atol sa gipahigayong satellite voter's registration, ang una nga gihimo sa mga jail facilities sa tibuok nasud ug gibutyag niya nga kwalipikado ang CPDRC nga kabutangan og special polling place alang sa iyang mga binilanggo.
Sigun sa balaod, 50 ka mga rehistradong botante lamang ang gikinahanglan aron kabutangan ang usa ka jail facility og usa ka special polling place sa panahon sa election.
Ang CPDRC karon may populasyon nga kapin na sa usa ka libo ka mga piniriso kinsa mipahimulos sa duha ka adlaw nga satellite voter's registration
Samtang gipahibawo ni Sarmiento nga nagtuo siya nga paboran sa Korte Suprema ang ilang tinguha sa pagpatuman gihapon sa automated election sa umaabot nga election sa sunod tuig. Kini tungod sa kadaghan sa mga Filipino ang nakauyon sa nahisgutang kahimanan gumikan sa kadali sa inihapay sa mga balota.
Nagtuo usab si Sarmiento nga tamdan sa Korte Suprema ang mga probisyon sa Automated Election System Law ilabina sa probisyon nga nagtumbok nga human sa 2010 election ang mga mosunod nga election sa nasud ipaagi na sa automated election system. (BANAT NEWS)